काठमाडौं, १ पुस । कास्की–२ बाट प्रतिनिधि सभा सदस्यमा निर्वाचित विद्या भट्टराईले आज पद तथा गोपनियताको सपथ लिएकी छिन् । उपसभामुख शिवमाया तुम्बाहाङ्फेले भट्टराईलाई मंगलबार दिउँसो १ बजे सिंहदरबारस्थित कृषि समितिको हलमा सपथ खुवाएकी हुन् ।
भट्टराई गत मंसिर १४ गतेको प्रतिनिधि सभाको उपनिर्वाचनमा कास्की-२ मा कांग्रेस उम्मेद्वार खेमराज पौडेललाई ८ हजार मतान्तरले पराजित गरेर सांसद चुनिएकी थिइन्। भट्टराईले २४ हजार ३ सय ९४ मत र खेमराजले १५ हजार ९ सय ९१ मत ल्याएका थिए।
उक्त सपथग्रहण समारोहमा नेकपाका संसदीय दलका उपनेता सुवासचन्द्र नेम्बाङ, संसदीय दलका प्रमुख सचेतक देवप्रसाद गुरुङ, राष्ट्रिय सभाका प्रमुख सचेतक खिमलाल भट्टराईलगायतको उपस्थिति रहेको थियो ।
तस्वीर : ईश्वर कार्की, रिपोर्टर्स नेपाल डटकम
