काठमाण्डौ । नेपाल भ्रमण बर्ष २०२० सुरु हुन १३ दिन मात्रै बाँकी छ । सरकारले तयारी कम गरे पनि लक्ष्य भने महत्वाकांक्षी राखेको छ । सरकारलाई २० लाख पर्यटक नेपाल भित्र्याउने लक्ष्यलाई भेट्न दैनिक साढे पाँच हजार पर्यटक नेपाल भित्र्याउनु पर्नेछ । तर काठमाडौंको सरसफाई देखि पुर्वधारको सुधार भने खासै देखिदैन ।
सरकार सन् २०२० लाई भ्रमण वर्ष मनाउने तयारीमा छ । सरकारले २०२० मा नेपालमा २० लाख पर्यटक भित्रयाउने महत्वकांक्षी योजना पनि राखेको छ । तर लक्ष्यलाई भेट्न दैनिक साढे ५ हजारदेखि ६ हजारको हाराहारीमा पर्यटक नेपालमा आउनुपर्ने हुन्छ । अहिले दैनिक औसतमा तीन हजारको हाराहारीमा विदेशी पर्यटक नेपाल आउने गरेका छन् । यो संख्यालाई झण्डै दोब्बर बनाउनुपर्ने हुन्छ । तर पर्यटकको पहिलो पाइला पर्ने काठमाण्डौ नै नेपाल भ्रमण वर्षका लागि तयारी अवस्थामा देखिदैन ।
पूर्वाधार अभावका कारण पर्यटन वर्ष सफल नहुने आशंका छ । सरकारले भ्रमण बर्षलाई सफल बनाउन बाह्रैमास पर्यटक ल्याउने गरी योजना बनाउनुपर्छ । यस्तै, २४ सै घण्टा त्रिभुवन अन्तराष्ट्रिय विमानस्थल संचालन गर्नेपर्ने र अन्य पर्यटन पूर्वाधारमा ध्यान दिन आवश्यक छ । विगतमा नेपालमा पर्वतीय गन्तब्य र साहसिक गतिविधिका लागि मात्रै पर्यटक आउने गरेकोमा अब कला संस्कृतिका क्षेत्रलाई पनि उजागर गर्न सरकारले नयाँ अभ्यास थाल्न आवश्यक छ ।
निजी क्षेत्रका पर्यटन व्यवसायीले पनि सरकारको तयारीप्रति सन्तुष्टी जनाउन सकेका छैनन् । यद्यपी सरकारलाई निरन्तर दबाब दिएपछि आशालाग्दो अवस्था सृजना हुँदै गएको पर्यटन व्यवसायी बताउँछन् । नेपाल भ्रमण वर्षलाई लक्षित गरी चार वटा ट्रेकिङ पिक अर्थात पदयात्राका लागि ४ वटा गन्तव्य प्राथमिकतामा राखिएको नेपाल पर्वतारोहण संघका महासचिव कुलबहादुर गुरुङ बताउँछन् ।
२० लाख पर्यटक भित्र्याउने सरकारी लक्ष्य भएपनि कुन देशबाट कति पर्यटक आउँछन भन्ने एकिन अनुमान भने सरकारसँग छैन् । नेपालमा आर्थिक बर्ष २०७५–७६ मा १२ लाख पर्यटक मात्रै नेपाल भित्रिएका थिए । गत आर्थिक बर्षमा दैनिक ३ हजार २ सय पर्यटक नेपालमा आएको तथ्यांक पर्यटन बोर्डसँग छ । तर, २०२० मा २० लाख पर्यटन भित्र्याउने सरकारको लक्ष्यअनुसार तयारी भएको देखिदैन ।
