काठमाडौँ, २४ पुस । नेपाली बजारमा सुनको भाउमा दिनहुँ नयाँ रेकर्ड कायम भएको छ । बुधबार सुन प्रतितोला ७६ हजार ५ सय रुपैयाँमा कारोबार भएको सुनचाँदी व्यवसायी महासंघले जानकारी दिएको छ । यो मूल्य अहिलेसम्मकै उच्च हो । महासंघका अनुसार एक सातामा तोलामा ३ हजार रुपैयाँ बढेको छ ।
‘गत बिहीबार प्रतितोला ७३ हजार ५ सय रुपैयाँ पुगेर रेकर्ड राखेको थियो,’ महासंघका पूर्वअध्यक्ष तेजरत्न शाक्यले भने, ‘त्यसपछि दिनहुँ नयाँनयाँ रेकर्ड कायम भएको छ ।’ पुस १७ मा सुनको भाउ प्रतितोला ७३ हजार ५ सय रुपैयाँ थियो । १८ गते प्रतितोला १ हजार रुपैयाँ बढेर ७४ हजार ५ सय रुपैयाँ पुग्यो । २० गते पुनस् १ हजार बढेर ७५ हजार ५ सय रुपैयाँमा कारोबार भएको महासंघको तथ्यांक छ ।
२१ गते प्रतितोला थप ५ सय रुपैयाँ बढेर ७६ हजार रुपैयाँ पुगेको थियो । २२ गते बुधबार भने प्रतितोला ५ सय रुपैयाँ घटेर ७५ हजार ५ सय रुपैयाँमा कारोबार भएको थियो । पुस २३ गते पुनस् १ हजार रुपैयाँ बढेर ७६ हजार ५ सय रुपैयाँ पुगेको छ । अन्तर्राष्ट्रिय बजारमा एकैदिन प्रतिऔंस ३० अमेरिकी डलर वृद्धि हुँदा स्थानीय बजारमा त्यसको असर परेको हो । ‘अन्तर्राष्ट्रिय बजारमा मंगलबार सुनको भाउ प्रतिऔंस १५ सय ५९।८० डलर थियो । बुधबार एकैदिन ३० डलर बढेर १५ सय ९०।९० पुगेको छ,’ महासंघका अध्यक्ष मोहन सुनारले भने, ‘यसले स्थानीय बजार पनि बढाएको हो ।’
किन बढ्यो मूल्य ?
अन्तर्राष्ट्रिय बजारमा लगानीकर्ताले सुरक्षित लगानी खोजिरहेका छन् । सुन सुरक्षित लगानी भएकै कारण लगानीकर्ता यसतर्फ आकर्षित छन् । माग बढेपछि सुनको मूल्य निरन्तर उकालो लागेको छ । सेयरका लगानीकर्ताले पनि सुन खरिद गरी सञ्चय गर्न थालेका छन् । अमेरिका र इरानबीच बढेको द्वन्द्वका कारण लगानीकर्ताहरू सुनतर्फ आकर्षित भएको जानकारहरू बताउँछन् ।
‘अमेरिका र इरानबीच युद्ध हुने त्रासले लगानीकर्ता सुनमा सञ्चयतर्फ लागेको देखिन्छ,’ महासंघका पूर्वअध्यक्ष तेजरत्न शाक्यले भने, ‘त्यही कारण दिनहुँ रेकर्ड बन्यो ।’ यीबाहेक अमेरिका र चीनबीचको व्यापार युद्ध पनि सुनको मूल्य बढ्नुको कारण हो । यी दुई मुलुकले डिसेम्बर १५ सम्म व्यापार युद्ध समाधान गर्ने प्रतिबद्धता जनाएका थिए । त्यसका लागि व्यापार सम्झौता भएको थियो । दुई मुलुकले आयात–निर्यात गर्दा डिसेम्बर १५ देखि भन्सार शुल्क घटाउने सम्झौता भएको शाक्य बताउँछन् । तर सम्झौता कार्यान्वयन भएन ।
‘दुई मुलुकबीच भएको सम्झौता कार्यान्वयन नहुँदा आर्थिक क्षेत्र विश्वस्त हुन सकेन,’ उनले भने, ‘त्यसले डिसेम्बर १५ मा प्रतिऔंस १४ सय ९० डलर रहेको सुनको मूल्य बढेर १५ सय २३ पुग्यो । त्यसपछि बिस्तारै भाउ बढ्न थालेको हो । बुधबारसम्म प्रतिऔंस १५ सय ९० डलर पुगेको छ ।’ आन्तरिक कारणले पनि मूल्य बढेको उनको भनाइ छ । डलरको तुलनामा भारु कामजोर छ । भारु कमजोर हुँदा नेपाली रुपैयाँ पनि कमजोर हुन्छ ।
कान्तिपुर दैनिकबाट
