काठमाडौँ, ८ फागुन । लमजुङको दोर्दी खोलामा निर्माण भइरहेको २५ मेगावाटको माथिल्लो दोर्दी ‘ए’ जलविद्युत् आयोजनाको निर्माण कार्य अन्तिम चरणमा पुगेको छ । आयोजनाले चैत ३० गतेभित्र विद्युत् उत्पादन गर्ने तयारी गरेको छ ।
निर्माण कार्य अन्तिम चरणमा पुगेको बेला गत वर्षायाममा बाढी पहिरोले पुरिएका संरचना मर्मतले ढिलाइ भएको प्रवद्र्धक लिबर्टी इनर्जी कम्पनी लिमिटेडले जनाएको छ । यसअघि भदौ १४ गते निर्माण सक्ने योजना रहेकोमा साउन ८ गतेको बाढीले आयोजनामा क्षति पु¥याएको थियो । आयोजना मर्मतसँगै बाँकी कार्यलाई तीव्रता दिइएको छ । आयोजनाको निर्माण कार्य ९६ प्रतिशत सकिएको आयोजनाका सञ्चालक राजेन्द्र वस्तीले बताएका छन् । ‘बाढीले पुरिएको भागको मर्मत सम्भार गरी आयोजनालाई अन्तिम रूप दिँदैछौँ । चैतभित्रै हामी विद्युत् उत्पादन गर्छौं’ उनले भने । आयोजनाका साइट प्रोजेक्ट म्यानेजर सुरेशप्रसाद जोशीका अनुसार आयोजनाको बाँध, डिसेन्डर तथा गेट संरचनाको काम ९४ प्रतिशत सकिएको छ । दुई हजार ६२३ मिटरको टनेल निर्माण ९६ प्रतिशत सकिएको छ । दुई हजार ८३४ मिटरको पेनस्टक पाइप बिच्छ्याउने र विद्युत् गृहको कार्य ९९ प्रतिशत सकिएको छ । मेसिनरी सामान जडान गर्न बाँकी छ । स्विच यार्डको सिभिल निर्माण कार्य ९० प्रतिशत सकिएको उनले बताएका छन् । आयोजनामा १२.५ मेगावाट क्षमताका दुईवटा पेलटन टर्बाइन रहने छन् । आयोजनाको ग्रसहेड ३२५ मिटर रहेको छ । उत्पादित विद्युत् नेपाल विद्युत् प्राधिकरणले विद्युत् गृह नजिकै दोर्दी गाउँपालिका ६ कीर्तिपुर बेँसीमा निर्माण गरिरहेको १३२ केभीको सब स्टेसनमा जडान गरिने छ । विद्युत् गृहदेखि सब स्टेसनको दूरी १३० मिटर छ ।
यसअघि तीन अर्ब ९६ करोड रुपियाँ लागत अनुमान गरिएको आयोजनाको लागत बढेर चार अर्ब ६३ करोड ६० लाख ९५ हजार रुपियाँ पुग्ने अनुमान गरिएको छ । भारतीय नाकाबन्दी, भूकम्प, बाढी पहिरोलगायतले समय अवधि थप हुँदा आयोजनालाई लागत ६७ करोड ६० लाख ९५ हजार रुपियाँको व्यभार थप भएको आयोजनाले जनाएको छ । २०७१ फागुनबाट सुरु गरिएको आयोजनामा नेपाल इन्भेस्टमेन्ट बैङ्कको नेतृत्वमा नौवटा बैङ्कले लगानी गरेका छन् । योजनामा बैङ्कको ७० प्रतिशत ऋण र ३० प्रतिशत प्रवद्र्धकको स्वपुँजी लगानी छ । नदीको बहावमा आधारित सो आयोजनाको प्रभावित क्षेत्रको विकासका लागि छ करोड रुपियाँ विनियोजन गरेको थियो । आयोजना निर्माणका क्रममा चार करोड खर्च गरिने र बाँकी दुई करोड आयोजनाबाट विद्युत् उत्पादनपछि स्थानीयको विकासमा खर्चिने आयोजनाले जनाएको छ । पेनस्टकको सिभिल र हाइड्रो मेकानिकलको काम माछापुच्छ«े जेभीले गर्दै आएको छ । हेडवक्र्स र पावरहाउस बज्रगुरु कन्स्ट्रक्सन प्रालिले गरिरहेको छ । (गोरखापत्र दैनिकबाट)
