बाँके, फागुन ९ । बागेश्वरी मन्दिरको पूर्वतर्फ शिव महादेवको मूर्ति छ । शिवरात्रीमा भोलेबाबाले खचाखच भरिने बागेश्वरी मन्दिर परिसरमा यस वर्ष शिवभक्त देखिएनन् ।
उसो त अन्य समयमा पनि जुँगे महादेवको पूजा अर्चना गर्न बागेश्वरीमा उस्तै भीड हुन्छ । अन्य समयभन्दा शिवरात्रीका दिन भीड बढ्ने गर्छ । जुँगे महादेवको मूर्तिमा प्रसाद चढाउन र पूजाअर्चना गर्न भक्तजन लामो समय लाइनमा बस्नुप¥यो ।
नेपाल प्रहरीले लाइनलाई व्यवस्थित गरिरहेको थियो । ‘बिहान ४ बजेदेखि लाइनमा बसिरहेकी छु’, नेपालगञ्ज–१८, की पवित्रा बस्नेतले भने, ‘लाइन घटिरहेको छ, अब पालो आउँला जस्तो छ ।’ मन्दिरमा विशेष गरी युवा युवतीको भीड देखिन्थ्यो ।
‘पोहोर साल त धेरै देखेको थिएँ यसपाली भोलेबाबाहरु देखिएनन् । केही चिसो मौसम भएर होला ?’ नेपालगञ्ज–१ की दिपिका रेग्मीले अड्कलबाजी गरेर भनिन्, ‘विगतका वर्षहरुमा बागेश्वरी मन्दिर परिसरमा धुँवा उडाइरहेका भोलेबाबा यसपालि हराएछन् ।’ दिपिकाले भनेजस्तै यस वर्षको शिवरात्रिमा बागेश्वरीमा भोलेबाबा देखिएनन् ।
यस वर्ष शिवरात्रिमा भाङ, धतुरो र गाँजा खान र बेच्न स्थानीय प्रशासनले कडाइ गरेको जिल्ला प्रहरी कार्यालय बाँकेका प्रमुख प्रहरी उपरीक्षक वीरबहादुर ओलीको भनाई रहेको छ । उनले भने, ‘भोलेबाबाको उपस्थिति नहुनुमा यसैको प्रभाव पनि हुनसक्छ ।’
संसारभर पाइने महादेवको मूर्तिमध्ये जुँगा भएको मूर्ति यहीँ मात्र छ । बागेश्वरी मन्दिर यस क्षेत्रकै ठूलो र प्रशिद्ध मन्दिर हो । यस स्थानमा सतीदेवीको जिब्रो पतन भएको भन्ने जनविश्वास छ । एउटा ठूलो तलाउको किनारामा रहेको बागेश्वरी मन्दिर नयाँ मुलुकका रूपमा बाँके, बर्दिया, कैलाली र कञ्चनपुर नेपालमा गाभिएपछि मात्रै पत्ता लागेको इतिहास छ । रासस
