काठमाडौं, १८ फागुन । संसदीय मामिला पत्रकार समाजका उपाध्यक्ष कृष्णा पौडेललाई सम्मान गरिएको छ । नेपाली पत्रकारको अन्तर्राष्ट्रिय सञ्जाल (इञ्जा) स्थापनाको दोस्रो वार्षिकोत्सवका अवसरमा उनलाई सम्मान गरिएको हो ।
समारोहमा मोफसलमा रही नेपाली भाषा र साहित्यका क्षेत्रमा विशिष्ट योगदान दिने वरिष्ठ साहित्यकार चूडामणि रेग्मीलाई एक हजार डलरसहितको इञ्जा स्रष्टा सम्मान प्रदान गरियो । पुरस्कारका लागि उक्त रकम अमेरिकामा बस्दै आएका गीतकार अम्बिका गुरुङले उपलब्ध गराए।
पत्रकारद्वय मेनका ढुङ्गाना (अछाम) र प्रकाशसिंह (बाजुरा) लाई जनही ५०० डलर राशिको इञ्जा सामुदायिक पत्रकारिता पुरस्कार प्रदान गरियो । पुरस्कारका लागि उक्त रकम अमेरिकामा रहेकी सुनिता खत्रीले सौजन्यस्वरुप उपलब्ध गराइन । ढुङ्गानालाई छाउपडी र सिंहलाई कुपोषणसम्बन्धी खोजमूलक समाचारका लागि उक्त पुरस्कार प्रदान गरिएको हो ।
सो अवसरमा नेपाल पत्रकार महासङ्घका अध्यक्ष गोविन्द आचार्यले मिडिया काउन्सिल विधेयक सरोकारवाला पक्षसँग आवश्यक छलफल नै नगरी अघि बढाइएको भनी गुनासो गरे । नेपाल टेलिभिजनका अध्यक्ष डा महेन्द्र विष्टले पछिल्लो समय नेपाली पत्रकारिता क्षेत्र व्यावसायिक रुपमा अघि बढिरहेको बताए।
पुरस्कार छनोट समितिका संयोजक तीर्थ कोइरालाले स्रष्टालाई सम्मान र समाजमा देखिएका विकृति तथा विसङ्गतिलाई गहिरोरुपमा चिरफार गर्ने सञ्चारकर्मीलाई प्रदान गरिएको पुरस्कारले सत्कर्म गर्नेलाई प्रेरणा मिल्नेछ भने ।
इञ्जाका केन्द्रीय अध्यक्ष गुणराज लुइँटेलले विश्वभर छरिएर रहेका नेपाली पत्रकारबीच सम्पर्क र समन्वय गर्न सहज होस् भन्ने हेतुले गठन भएको इञ्जाले सेवामूलक संस्थाका रुपमा पत्रकारलाई प्रेरित गर्ने कार्यक्रम सञ्चालन गर्दै आएको जानकारी दिए।
संस्थाका केन्द्रीय उपाध्यक्ष टङ्क पन्तले संस्थाले पत्रकारलाई प्रेरित गर्न सामुदायिक र साहसिक पत्रकारिता पुरस्कारको अतिरिक्त स्रष्टासम्मान कार्यक्रम गर्दै आएको बताए ।
समारोहमा नेपाल टेलिभिजनका अध्यक्ष विष्ट, नेपाल समाचारपत्रका प्रधानसम्पादक कपिल काफ्ले, प्रेस काउन्सिल नेपालका सदस्य सङ्गीता खड्का, राष्ट्रिय सूचना आयोगका पूर्वसदस्य किरण पोखरेल र संसदीय मामिला पत्रकार समाजका उपाध्यक्ष कृष्णा पौडेललाई सम्मान गरिएको थियो ।
समारोहमा उपचाररत पत्रकार कमल पौडेलको सहयोगका लागि इञ्जाले सङ्कलन गरेको रु १४ लाख उनको परिवारलाई हस्तान्तरण गरिएको थियो ।
