काठमाडौ, फागुन १९ । प्यूठान नगरपालिका–१० मरन्ठाना खरिबोटका विष्णु गिरीले निजी लगानीमा ‘राप्ती गण्डकी युनिफर्म उद्योग’ सञ्चालनमा ल्याएका छन् । सैनिक सेवाबाट अवकाश हुनुभएका ४४ वर्षीय उनले २०६९ सालबाट उद्योग सञ्चालनमा ल्याएका हुन् । उनले भने,“शुरुमा बुटवलमा उद्योग सञ्चालन गरे । राम्रोसंग सञ्चालन हुन नसकेपछि गत वर्षदेखि आफ्नै गाउँमै ल्याए । अहिले राम्रो चलेको छ ।
”
विद्यालयका छात्रछात्रालाई आवश्यक पर्ने टाइ,बेल्ट, ट्र्याकसुट, टिसर्ट लगायतका पोसाक उद्योगमा उत्पादन हुन्छन् । ती सामग्री जिल्लाका विद्यालय सहित छिमेकी जिल्ला रोल्पा, दाङ, अर्घाखाँची, बाग्लुङलगायतमा समेत विक्री हुने गरेको उहाँले जानकारी दिए । रु ३० लाख लगानी रहेको उद्योगमा आठ जनाले रोजगारीसमेत पाएका छन् । हालसम्म रु आठ लाख आम्दानी लिएको उहाँले जानकारी दिए । अभिभावकलाई जिल्लामै उद्योग सञ्चालनमा आएसँगै सहज भएको छ । –रासस
