काठमाडौँ, २२ फागुन। आज भन्दा झण्डै १२ बर्ष अघि आफ्नो एउटा मिर्गौला दिएर अहिलेका प्रधानमन्त्री केपी शर्मा ओलीलाई बचाएकी अञ्जान घिमिरे ओलीलाई ओलीको दोस्रो प्रत्यारोपण सफल भएकोमा जति खुसि लागेको छ त्यतिनै दुखी पनि छिन् उनी । उनले दिएको मिर्गौलाले काम गर्न छाडेपछि नातामा भान्जी पर्ने समिक्षा संग्रोलाको मिर्गौला अहिले प्रधानमन्त्री ओलीमा प्रत्यारोपण गरिएको हो ।
२१ वर्षको उमेरमा नाताले जेठाजु र एकै परिवार भएपनि नाताका लागि नभएर देशका लागि आफुले मिर्गौला दिएको अञ्जानले नेपाली रेडियो नेटवर्ककको कुरा कानिमा बताइन् । उनले भनिन्,‘उहाँले राजनीतिमा लागेर धेरै संघर्ष गरिसक्नुभएको थियो । देशका लागि काम गर्छु भन्ने उहाँमा जोलो जोस र जागर थियो । त्यसैले उहाँले मेरो मिर्गौला फेल भयो अब के गर्ने भनेपछि मैले एक्कासी म दिन्छु भने र दिएँ’ ।
उनले भनिन्,‘मलाई कसैले आग्रह गरेको होइन । उहाँ बिरामी भएर सुतेको जुन अवस्था थियो, उहाँलाई कसरी सहयोग गर्न सकिएला भन्ने भाव मभित्र स्वतस्फुर्त जागेर आयो । उहाँलाई के भएको भनी सोध्दा किड्नी फेल भएछ भन्नुभयो । मैले तत्कालै ‘मिल्छ भने त तपाईंका लागि म आफ्नो किड्नी दिन्छु नि’ भनेँ । उहाँले ‘तँ सानै छेस् के दिन्छेस्’ भन्दै हाँसोमा उडाउनुभयो । मैले म सानै उमेरकी भए पनि मिल्छ भने दिएरै छोड्छु, जँचाएर हेर्नुप¥यो भनेर जिद्दी गरेँ । आखिर जाँच गर्दा मिल्ने नै भयो । मेरो रगत ‘ओ पोजेटिभ’ उहाँको ‘ओ नेगेटिभ’, तर ‘ओ’ मिलेपछि किड्नी दिन मिल्नेरहेछ ।
अस्पताल भर्ना हुनु एकदिन अघि बालुटारमा गएर प्रधानमन्त्रीलाई भेटेको उनि बताउँछिन । प्रधानमन्त्री ओलीसंग उनले दुखेसो पोख्दै भनिन्‘ मैंले तपाईलाई १५ वर्ष पनि बचाउन सकिन’ आफुले दिएको मिर्गौलाबाट ओलीलाई १५ वर्ष पनि बचाउन नसेकेकोमा दुख लागेको छ अञ्जानलाई । अझै तिन वर्ष सहज रुपमा काम गरिदिएको भए देश र जनताका लागि ओलीले सहज रुपमा काम गर्न सक्ने उनको बुझाई हो ।
कुराकानीका क्रममा अञ्जानले भनिन्,‘ मैले परिवारको मान्छे भनेर मिर्गौला दिएको हैन । नेपाल र नेपालीको सुखद भविश्वका लागि दिएको हो । दोस्रो मिर्गौला प्रत्यारोपण पछि मैले उहाँसंग भेट गर्न पाएको छैन् । तर, सफल भएको खबरले धेरै खुसी छु’ । अञ्जानले आफुसंग ओलीले मिर्गौल नमागेको र भविश्यमा राजनीतिमा गएर लाभको पदमा पुग्न र आर्थिक लाभका लागि आफुले मिर्गौला नदिएको बताइन् ।
अञ्जानको जन्म चितवनमा भएको हो । २०४२ वैशाख २३ गते चितवनको केशरवाग, गीतानगरमा जन्मिएकी अन्जान अहिले राष्ट्रपति कार्यलयकी कर्मचारी हुन । उनको ०६१ माघ १९ मा हालका प्रधानमन्त्री केपी ओलीका काहिँलो भाइ ताराप्रसाद ओलीसँग मागीविवाह भएको हो । अञ्जानले १५ महिनाको छोरा हुर्किरहेको अवस्था स्वेच्छाले आफ्ना जेठाजु अर्थात् केपी शर्मा ओलीलाई किड्नी दान गरेकी थिइन् ।
अञ्जान भन्छिन,‘ उहाँलाई प्रधानमन्त्री बनाउने या बनेको हेर्ने चाहना मभित्र थियो, त्यो पूरा भएको छ । उहाँ प्रधानमन्त्री हुनुमा मैले उहाँका लागि गरेको अङ्गदानको भूमिका छ भन्ने अनुभूतिले मलाई खुसी तुल्याउँछ । जबदेखि यो देशको राजनीति अलिक बढी नै उथलपुथल हुन थाल्यो, त्यसबेलादेखि नै उहाँ प्रधानमन्त्री भइदिए सबै कुरा राम्रो होला कि भन्ने लाग्न थालेको थियो । परिवारको सदस्य हुनुभएकाले मात्र होइन, वास्तवमै उहाँ अरू नेताभन्दा फरक क्षमता या शैलीसम्पन्न हुनुुहुन्छ । उहाँको बोलाइ र कामगराइ एकदम प्रस्ट हुन्छ । भन्ने नै हो भने अरू नेताको त म त्यत्ति बुझ्दिनँ’ ।-रेडियो एनआरएनबाट
