काठमाडौं, २८ फागुन । दोस्रो पटक मृगौलाको प्रत्यारोपण गरेका प्रधानमन्त्री ओलीलाई सामान्य मान्छे जस्तै सक्रिय हुन ६ महिनादेखि वर्ष दिन लाग्ने उनको उपचारमा संलग्न चिकित्सकले बताएका छन् । प्रधानन्त्रीका निजी चिकित्सक डा. दिव्या सिंह शाहले अपेक्षाकृत सुधारका लक्षण देखिएको भनिएपनि डाक्टरहरुलाई डिस्चार्ज गर्नुपर्छ भन्ने एकिन नहुँदासम्म डिस्चार्ज गर्न नसकिने बताइन्।
अहिलेको अवस्था हेर्दा चाँडै डिस्चार्ज गर्न सक्छौँ। भोली नै पर्सी नै भनेर मिति तोक्न सकिँदैन तर छिटो भन्दा छिटो डिस्चार्ज गरेर पठाउँछौँ’, उनले भनिन्। डा. शाहले अहिले नै डिस्चार्ज गर्दा हुने भएपनि घरमा समेत अस्पतालको जस्तै व्यवस्थापन गर्नुपर्ने भएकाले केही समय लाग्ने बताइन्। परिवारले समेत घरमा व्यवस्थापन गर्नुपर्ने भएकाले केही दिन अस्पतालमा राख्न आग्रह गरेको उनले बताएन्।
प्रधानमन्त्री ओलीले एक महिना सावधानी अपनाउनुपर्ने डा. शाहले बताइन्। औषधिको डोज बढी भएका कारण संक्रमणको खतरा रहेपनि पहिले पनि प्रत्यारोपण गरेको र परिवारलाई समेत त्यस सम्बन्धि ज्ञान भएकाले संकट नआउने उनले बताइन्। डा. शाहले रुघाखोकी र अरु संक्रमण भएका व्यक्तिहरुबाट जोगिनुपर्ने बताइन्। मृगौला प्रत्यारोपणपछि प्रधानमन्त्रीको स्वास्थ्यका विषयमा सार्वजनिक सञ्चार माध्यमहरुमा विभिन्न टिकाटिप्पणी हुन थालेपछि प्रधानमन्त्रीका प्रेस सल्लाहकारको अगुवाईमा प्रत्यारोपणमा संलग्न चिकित्सकहरुसँग पत्रकारहरुको अन्तरक्रिया गराइएको हो। (नागरिक दैनिकबाट)
