काठमाडौं, २८ फागुन । निवर्तमान सञ्चारमन्त्री गोकुलप्रसाद बाँस्कोटाको निर्माणाधीन घरमा विष्फोट प्रतिबन्धित नेत्रविक्रम चन्द (विप्लव) नेतृत्वको नेपाल कम्युनिष्ट पार्टीले गरेको देखिएको छ । बिष्फोट गराइएको घरमा नेपाल कम्युनिस्ट पार्टीको नाममा पर्चा भेटिएको छ ।
पर्चामा बाँस्कोटाको घरमा आक्रमण गर्नुको कारणसहितको बुँदा उल्लेख छ । जसमा उनले करोडौं भ्रष्टाचार गरेको आरोप छ । सञ्चारमन्त्री हुँदा करोडौं कमिशन मागेको देखि देशलाई नोक्शान पुर्याइएको आरोप छ ।
बाँस्कोटाको निर्माणाधिन घरमा आज बुधबार बिहान करिब ७ः४० बजे प्रेसर कुकर बम विस्फोट भएको थियो । उक्त विष्फोटको प्रारम्भिक अनुसन्धानमा विप्लव नेतृत्वको प्रतिबन्धित समूह संलग्न देखिएको प्रहरीको भनाइ छ ।
महानगरीय प्रहरी आयुक्तको कार्यालय, रानीपोखरीका डीआईजी विश्वराज पोखरेलले घटनास्थलमा सञ्चारकर्मीसँग प्रतिबन्धित समूहलाई लक्षित गरेर अनुसन्धानको दायरालाई साँघुरो बनाएका बताएका छन् ।
यस्तै, प्रतिबन्धीत नेकपाले सेक्युरिटी प्रिन्टिङ प्रेस खरिद प्रकरणमा ७० करोड घुस मागेर भ्रष्टाचारी अनुहार उदांगो पारेकाले कारबाही गरिएको भनिएको छ । सेक्युरिटी प्रिन्टर प्रेस खरिद प्रकरणमा कमिशनको टेप बाहिर आएपछि बाँस्कोटाले सञ्चारमन्त्रीले राजीनामा दिएका थिए ।
विप्लव समूहको पर्चामा के छ
भ्रष्टाचारी गोकुल बास्कोटामाथि कारबाही किन ?
१। सेक्युरिटी प्रिन्टिङ प्रेस खरिदप्रकरणमा ७० करोड घूस मागेर भ्रष्टाचारी अनुहार उदाङ्गो पारेकाले ।
२। २४ अर्बको सेटलाइट खरिद प्रकरणमा करोडौँ रकम भ्रष्टाचार गरेकाले ।
३। १९ अर्बको फोर जी सेवा विस्तारका दौरान करोडौँ रकमको दुरुपयोग गरेकाले ।
४। १० अर्बको अप्टिकल फाइबर विस्तारमा करोडौँ कुम्ल्याएर देशलाई कङ्गाल बनाउने भुमिका खेलेकाले ।
५। मोबाइल डिभाइस र स्कुलमा इन्टरनेट सेवा–सुविधाका नाममा करोडौँ हिनामिना गरेकाले ।
६। सरकारको प्रवक्ता पदको दुरुपयोग गरी देशभरका ठूला परियोजनाबाट अर्बौं घोटाला गरेकाले ।
७। नेपाल कम्युनिस्ट पार्टीमाथि प्रतिबन्ध लगाउने, फासिवादी दमनको योजनाकार र हत्याको मतियार बनेकाले ।
८। राष्ट्र, जनता र क्रान्तिका विरुद्ध गोयबल्स शैलीमा निकृष्ट, उद्दण्ड, अराजनीतिक र गुण्डागर्दी भूमिकामा उत्रिएकाले ।
९। आफ्नो औकात भुलेर क्रान्तिप्रेमी जनतामाथि फासिवादी दमन लाद्ने, चरम असहिष्णु, दलाल पुँजीवादी सत्ताको असली ठेकेदार र मुलुकमा साँढेखालको दादागिरी मच्चाएकाले ।
१०। देशलाई अहिलेको जर्जर र सङ्कटग्रस्त अवस्थामा पुर्याउने नामुद दलाल भ्रष्टमध्ये एक भएकाले ।
नेपाल कम्युनिस्ट पार्टी
