काठमाडौं, ३० फागुन । भारतीय प्रधानमन्त्री नरेन्द्र मोदीले सार्क सदस्य राष्ट्रहरु मिलेर कोरोना भाइरसविरुद्ध बलियो रणनीति बनाउने प्रस्ताव गरेका छन् । उनले यसबारे सबै नेताहरुले छलफल गरेर रणनीति बनाउन प्रस्ताव गरेका हुन् ।
शुक्रबाट ट्वीटरमार्फत् मोदीले सार्क देशका नेताहरुलाई बलियो रणनीति बनाउने प्रस्ताव गर्दै भने, ‘हामीले विश्वलाई उदाहरण प्रस्तुत गर्दै स्वस्थ ग्रह बनाउन योगदान दिन सक्छौं ।’ उनले सार्क राष्ट्रका नेताहरुले भिडियो कन्फरेन्समार्फत् रणनीति बनाउनका लागि छलफल गर्न सकिने समेत बताए ।
भारतमा कोरोना भाइरसको संक्रमण फैलिदै जाँदा एक व्यक्तिको मृत्यु भएको खबर सार्वजनिक भएपछि मोदीको पछिल्लो धारणा सार्वजनिक भएको हो ।
सार्क शिखर सम्मेलन हुन नसकिरहेको र सार्क निष्कृय जस्तै भइरहँदा मोदीले सार्क राष्ट्र मिलेर अगाडि बढ्नुपर्ने बताउनुलाई अर्थपूर्ण मानिएको छ ।
