काठमाडौं, २२ चैत्र । नेपालमा थप तीनजना कोरोना भाइरसका तीनजना संक्रमित भेटिएका छन् । स्वास्थ्य मन्त्रालयका अनुसार नमूना परीक्षणका क्रममा तीनजनाको कोरोना संक्रमण भेटिएको हो ।
संक्रमित दुईजना भारतबाट हालै फर्किएका हुन् भने एकजना नेपालभित्र नै रहँदै आएकी हुन् । संक्रमित ३४ वर्षीया महिला यसअघि दुबईबाट फर्किएका धनगढीका ३४ वर्षीय पुरुषका आफन्त हुन् । दुबईबाट फर्किएका ती पुरुषबाट ती महिलामा संक्रमण सरेको बुझिएको छ ।
संक्रमित अर्का भारतको मुम्बईबाट फर्किएका कैलालीका २१ वर्षीय पुरुष हुन् । उनी रोजगारीका लागि मुम्बईमा थिए । लकडाउन अगाडि नै नेपाल फर्किएको बुझिएको छ ।
यसैगरी, अर्का नेपाली उत्तराखण्डबाट फर्किएका कञ्चनपुरका ४१ वर्षीय पुरुष हुन् । उनी पनि कामको सिलसिलामा उत्तराखण्ड पुगेको र कोरोना रोकथामका लागि लकडाउन भएपछि फर्किएका हुन् ।
अहिलेसम्म हालै विदेशबाट फर्किएकामा कोरोना भाइरसको संक्रमण हुँदै आएकोमा देशभित्र मानिसबाट मानिसमा समेत सरेको छ ।
