२०७७ महाउथलपुथलकारी वर्ष हुनसक्छ : भट्टराई

काठमाडौं, १ बैशाख । समाजवादी पार्टीका संघीय परिषद अध्यक्ष तथा पूर्व प्रधानमन्त्री डा. बाबुराम भट्टराईले नयाँ वर्ष २०७७ साल महाउथलपुथलकारी वर्ष हुनसक्ने टिप्पणी गरेका छन् । नयाँ वर्षको अवसरमा शुभकामना दिँदै भट्टराईले यस्तो टिप्पणी गरेका हुन् । उनले २०७६ साल नेपालमा शासकले करप्सन भाइरसको महामारी थोपरेको पनि आरोप लगाएका छन् । उनले भनेका छन्, त्यसमाथि हाम्रो देशका ‘कम्युनिस्ट’को खोल ओढेका आसेपासे पुँजीवादी शासकहरूले थप करप्सन भाइरसको महामारी हामीमाथि थोपरे१

उनले नेपाली इतिहासमा ७ अंक पछाडि जोडिएको बर्ष प्रायः उथलपुथलपूर्ण रहदै आएको उल्लेख गर्दै यो बर्ष त दुइवटा सात ७७ भएको बर्ष हुनाले महाउथलपुथलकारी बर्ष हुनसक्छ पनि टिप्पणी गरेका न् । उनले भने-“देश कोरोना भाइरस र करप्सन भाइरस मुक्त होस्१ सबैको भलो होस्१ हार्दिक शुभकामना!”

नेता भट्टराईले सामाजिक सञ्जाल फेशबुकमार्फत दिएको नयाँ वर्षको शुभकामना यस्तो छ :

फेरि एक पटक एउटा बर्ष ( वि सं २०७६ ) वितेर अर्को बर्ष ( २०७७ ) शुरू भएको छ! अर्थात् हाम्रो जीवनको ३६५ दिन वा ८,७६० घण्टा वा ५२५,६०० मिनेट वा ३१,५३६,००० सेकेण्ड सकिएको छ; हामी त्यति नै समयले मृत्यु नजिक हुँदैछौं! यो तपाईंहाम्रो इच्छानिरपेक्ष भैरहने प्रकृतिको नियम हो!

ब्रह्माण्डको एक मात्र चेतनशील प्राणी (अहिलेसम्म थाहा भए अनुसार ) हुनुको नाताले यो समय हामीले मानव र प्रकृतिको सर्वोत्तम हितमा लगाउन सक्छौं! तर गत बर्ष हामीले सामुहिक रूपमा र हाम्रा शासकहरूले विशिष्ट रूपमा गरेका गल्ती  र वदमाशीका कारणले हामीलाई प्रकृतिले हाम्रो जीवनकालको सबभन्दा ठूलो दण्डको रूपमा कोरोना भाइरसको महामारी दियो! त्यसमाथि हाम्रो देशका ‘कम्युनिस्ट’को खोल ओढेका आसेपासे पुँजीवादी शासकहरूले थप करप्सन भाइरसको महामारी हामीमाथि थोपरे!