ईलाम, २३ वैशाख । विभिन्न बिष्फोटक पदार्थ सहित ३ जना सोमबार राति पक्राउ परेका छन् । माई नगरपालिका बरुङबाट विभिन्न बिष्फोटक पदार्थ सहित ३ जनालाई प्रहरीले पक्राउ गरेको हो ।
पक्राउ पर्नेहरुमा संखुवासभा चैनपुर नगरपालिकाका हिमाल भन्ने पुष्प कोईराला, ताप्लेजुङ मुकुवाखोला गाउँपालिकाका जलन भन्ने पासाङ डन्डु शेर्पा र उदयपुर तामलिक गाउँपालिकाका सौरब भन्ने पासाङ तामाङ रहेका छन् ।
उनीहरुको साथबाट ईलेक्ट्रिक डेटोनेटर १९ थान, सकेट बम १ थान, प्रेसरकुकर बम १ थान, कुपि बम १ थान, पाइप बम १ थान, बिष्फोटक पदार्थ बनाउन प्रयोग गरिने कच्चा पदार्थ करिब ३ केजी, डेडकट वायर ६७ फिट, बाइनाकुलर १ थान, सलाई १ दर्जन, रिमोट कन्ट्रोल ४ थान, खुकुरी २ थान, खाली प्रेसरकुकर १ थान, मोबाइल ८ थान लगायतका सामानहरु प्रहरीले बरामद गरको छ ।
प्रहरी चौकी दानाबारी, प्रहरी चौकी चिसापानी र प्रहरी चौकी महमाई तथा सशस्त्र प्रहरी बल दानाबारीबाट खटिएको संयुक्त टोलीले सोही ठाउँस्थित खाली घरमा लुकिछिपी बसेको अवस्थामा उनीहरुलाई फेला पारी पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको जनाएको छ ।
