संस्कृति, पर्यटन तथा नागरिक उडड्यनमन्त्री योगेशकुमार भट्टराईले हिमाल आरोहणसँग सम्बन्धित जनशक्तिलाई हिमाल सफाइलगायत क्षेत्रमा परिचालन गर्न सरकार सकारात्मक रहेको बताउनुभएको छ । पर्वतीय पर्यटनसँग सम्बन्धित क्षेत्रका व्यक्तिसँग आज मन्त्रालयमा भएको छलफलमा उहाँले चालु आर्थिक वर्षभित्र हिमाल सफाइको कार्यक्रम सञ्चालनको तयारी भएको जानकारी दिनुभयो ।
नेपाल पर्वतारोहण संघ (एनएमए) को अगुवाइमा बुझाइएको संयुक्त मागपत्र बुझ्दै उहाँले आरोही तथा अन्य कर्मचारीलाई राहत पुग्ने कार्यक्रम ल्याउन सरकारको ध्यानाकर्षण भएको स्पष्ट गर्नुभयो ।
एनएमए अध्यक्ष सन्तवीर लामाले पर्वतीय पर्यटनको क्षेत्रमा कार्यरत आरोही र आरोहणमा संलग्न सहयोगीका लागि तत्कालै राहतका कार्यक्रम सञ्चालन गरी आगामी आर्थिक वर्ष २०७७÷७८ को बजेट तथा कार्यक्रममा समावेश गरेर पर्वतीय पर्यटन क्षेत्रलाई पुनर्जीवन दिन माग गर्नुभयो ।
प्रस्तावित पर्यटन ऐन २०७६ का सम्बन्धमा संघका तर्फबाट राखिएका सुझाव र संघमार्फत भएका प्रयासका विषयमा समेत जानकारी गराइएको थियो ।
उक्त मागपत्रमा हिमाल सफाइ, हिमचुलीको अध्ययन तथा पहिचान, पदमार्ग, आरोहण मार्ग र उच्च भञ्ज्याङको अध्ययन, निर्माण तथा पुनः निर्माण, चेन एङकर र साइनेज जडानलगायत कार्यक्रमबारे अवगत गराइएको छ । त्यसैगरी हिमाली भागमा पोर्टर सेल्टर र शौचालय निर्माण, आरोहणसँग सम्बन्धित जनचेतनामूलक कार्यक्रमको दिगोपनका लागि आरोहणसँग सम्बन्धित माउण्टेन गाइड तथा आरोहणमा संलग्न सहयोगीका लागि नवीकरणीय तालिमको माग गरिएको संघले जनाएको छ ।रासस File photo
