राँझा, १७ जेठ । बाँकेको राप्तीसोनारी गाउँपालिकाका एक जना कोरोना संक्रमित भएका वडाध्यक्ष अहिले आइसोलेशन केन्द्रमा छन् । आफू संक्रमित भएकामा भन्दा जनताको स्वास्थ्यप्रति उनको चासो र चिन्ता छ । ‘जनताको सेवा अनि आफ्नो कर्तव्य वहन गर्दागर्दै कर्तव्यभूमिमै ढलिएछ भने पनि रत्तिभर पिर छैन, पिर त मेरा जनताको स्वास्थ्यको छ, भगवान्सँग प्रार्थना गर्छु, कसैलाई पनि केही नहोस्’ उनले जनतालाई सान्त्वना दिँदै भनेका छन्, ‘नआत्तिऔँ, बरु सावधानी अपनाऔँ ।’
भारतको कोरोना संक्रमित शहरबाट फर्किएका जनतालाई भारतीय शहर रुपैडिहासम्म पुगेर वडाको क्वारेन्टिनमा पु¥याउने र क्वारेन्टिनमा बसेका नागरिकको सेवामा खटिँदै आएका उनको दुई दिनअघि कोरोना परीक्षण रिपोर्ट पोजेटिभ आएको छ ।
जनताकै सुरक्षाका लागि काम गर्दागर्दै संक्रमित हुनुपरेकामा आफू कहीँकतै दुःखी नभएको बताउँदै उनले जनताको सेवा अनि आफ्नो कर्तव्य पूरा गर्नेक्रममा आफू भाइरसको संक्रमणमा परे पनि वडावासीलाई सुरक्षा सतर्कता अपनाउन अनुरोध गरेका छन् । उनले जनतालाई सुरक्षित बनाउनकै लागि आफ्नो जिउज्यानै जोखिममा राखेर यथाशक्य प्रयास गरेकै हो तर स्वास्थ्य शाखाको चरम लापरबाहीका कारण हिजो क्वारेन्टिनमा बसेका मान्छेहरु डिस्चार्ज भएकामा सबै सामु माफी चाहेको बताए । उनले भने, ‘क्वारेन्टिन व्यवस्थापनमा खानपिन, बसाइ लगायतको व्यवस्थापन वडाबाट हुँदै आएको थियो, सुरक्षासम्बन्धी व्यवस्थापन सुरक्षा निकायले हेर्दै आयको थियोे भने क्वारेन्टिनमा आउने मान्छेको भर्ना जाँच अनि डिस्चार्जको जिम्मा स्वास्थ युनिटको हो ।’
वडाअध्यक्षमा कोरोना संक्रमण पुष्टि भएपछि उनीसँग सम्पर्क भएको हुन सक्ने आशंकामा गाउँपालिकाका जनप्रतिनिधि र कर्मचारीलाई वडा नम्बर ३ स्थित आश्रय भवनको क्वारेन्टिनमा राखिएको छ । गाउँपालिकाका अध्यक्ष लाहुराम थारु र उपाध्यक्ष धनीकुमारी खत्री, विभिन्न वडाका वडाध्यक्ष र कर्मचारीलाई क्वारेन्टिन र होम क्वारेन्टिनमा राखिएको गाउँपालिकाका प्रमुख प्रशासकीय अधिकृत दलबहादुर बस्नेतले बताए ।उनका अनुसार कोरोना पोजेटिभ आएका सबै व्यक्तिलाई आइसोलेशनमा राखिएको छ । कोरोना सङ्क्रमितको कन्ट्रयाक्ट ट्रेसिङ गरेर स्वाब संकलन गर्ने कार्य भइरहेको छ ।
यसैबीच नेपालगञ्ज उपमहानगरपालिका र नरैनापुर गाउँपालिकामा देखिएको कोरोना संक्रमण बाँके जिल्लाभर बढ्दै गएको छ । गत वैशाख १९ गते पहिलो पटक बाँकेको नेपालगञ्जमा कोरोना संक्रमण देखिएको थियो । पहिलो संक्रमित भेटिएको एक महिनाको अवधिमै बाँकेमा कोरोना संक्रमितको संख्या बढेर १८१ पुगेको छ । शुक्रबार मात्रै बाँकेको डुडुवा गाउँपालिकाका १० जनामा कोरोना संक्रमण पुष्टि भएको थियो ।
नेपालगञ्जबाट शुरु भएको संक्रमणकोक्रम नरैनापुर, खजुरा, राप्तीसोनारी, डुडुवा हुँदै बैजनाथ गाउँपालिकासम्म फैलिन पुगेको छ । नरैनापुर गाउँपालिका कोरोना संक्रमणको प्रमुख केन्द्र बनेको छ । नरैनापुरमा मात्र शुक्रबारसम्म एक जनाको ज्यान जाने गरी ११४ जनामा कोरोना संक्रमण फैलिएको छ ।नेपालगञ्जमा २७, डुडुवामा १८, राप्तीसोनारीमा १२, बैजनाथमा सात र खजुरामा तीन जना कोरोना संक्रमित भेटिएका छन् । आठ स्थानीय तहमध्ये कोहलपुर नगरपालिका र जानकी गाउँपालिकामा अहिलेसम्म संक्रमण नदेखिएको जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिए ।
उनका अनुसार बाँकेका संक्रमितमध्ये पाँचको दाङको बेलझुण्डीस्थित कोरोना विशेष अस्पतालमा उपचार भइरहेको छ भने अन्यको बाँकेकै विभिन्न अस्पताल तथा आइसोलेशन केन्द्रमा राखेर उपचार भईरहेको छ । संक्रमितमध्ये खजुरास्थित कोरोना विशेष अस्पतालमा १०, लायन्स डेन्टल अस्पतालको आइसोलेशन केन्द्रमा २३, कृषि तालीम केन्द्र खजुराखुर्दको आईसोलेशन केन्द्रमा ३९, कोहलपुर पिपिरीस्थित कृषि विकास बैंकको आइसोलेशन केन्द्रमा ४१, राप्तीसोनारीको आइसोलेशन केन्द्रमा ११, साहापुरुवा डुडुवाको आईसोलेशन केन्द्रमा १८ र बैजनाथको वनकटवा प्राथमिक स्वास्थ्य केन्द्र आइसोलेशन केन्द्रमा सात जनाको उपचार भइरहेको जिल्ला स्वास्थ्य कार्यालय बाँकेका फोकल पर्सन श्रेष्ठले जानकारी दिए । रासस
