काठमाडौँ, २९ जेठ । जिल्ला सदरमुकाम मार्तडीमा रहेको बाजुराका क्याम्पसका क्वारेन्टिनमा बसेकालाई जिल्ला आयुर्वेद स्वास्थ्य केन्द्र बाजुराले निःशुल्क औषधि उपलब्ध गराउनुका साथै योगाभ्याससमेत गराएको छ ।
केन्द्रले बुधबार उक्त क्वारेन्टिनमा बसेका ९५ जनालाई औषधि वितरण गरिएको र योगाभ्यास पनि गराएको जिल्ला आयुर्वेद स्वास्थ्य केन्द्र बाजुराका कार्यालय प्रमुख दीक्षा भण्डारीले बताएका छन् । उनले क्वरेन्टिनमा बस्दै आएकाको तनाव व्यवस्थापन र उच्च मनोबल बनाउनका लागि योगाभ्याससम्बन्धी जानकारीसहित १२ चरणका योगाभ्यास गराएको भण्डारीले जानकारी दिएका छन् ।
रोग प्रतिरोधात्मक क्षमता बढाउन र शरीरको रगत चलायमान बनाउन आयुर्वेदिक औषधिसहित योगाभ्यास गराएको प्रमुख भण्डारीले बताएका छन् । योगाभ्यास तथा औषधि वितरण कार्यक्रममा बडीमालिका नगरपालिकाका नगरप्रमुख पदम बडुवालले क्वारेन्टिनमा बसेकाका लागि नगरपालिका सबै सेवा दिन तयार रहेको बताएका छन् । नगरपालिकाले क्वारेन्टिनमा बसेकाका लागि कुनै पनि सेवा सुविधामा कमी आउन नदिने बताएका छन् । क्वारेन्टिनमा रहेका नगरका नागरिकले अनावश्यक कुरामा भन्दा सबैले जिम्मेवार भई बस्न नगरप्रमुख बडुवालले आग्रह गरेका छन् ।
जिल्ला आयुर्वेद स्वास्थ्य केन्द्र बाजुराले पछिल्लो समयमा बाजुरामा विभिन्न रोगमा बिरामीलाई आयुर्वेद उपचार सेवा प्रभावकारी बनाउँदै गएको छ । आयुर्वेद अस्पतालमा बाथ, अम्लपित्त, दम, खोकी, पिनास, पायल्स, छालारोग, स्त्रीरोग, उच्च रक्तचापलगायतका रोगहरुको उपचार हुँदै आएको केन्द्र प्रमुख भण्डारीको भनाइ छ ।
आयुर्वेदभन्दा पहिले खासै बिरामी नआउने गरेको केही समयमा प्रचारप्रसार हुन थालेकाले बिरामीको सङ्ख्या बढ्दै गएको उनले बताएका छन् । केन्द्रले सुनौला हजार दिनका आमालाई दूध बढाउने औषधि र ज्येष्ठ नागरिकको लागि रसायन औषधि वितरण गर्दै आएको केन्द्रले जनाएको छ । अस्पतालमा ओपिडी सेवा, पूर्वकर्म, पञ्चकर्म सेवा र वितरण हुँदै आएको छ ।
क्वारेन्टिनमा रहेकालाई औषधि वितरण कार्यक्रममा बडीमालिका नगरपालिकाका नगरप्रमुख पदम बडुवाल, उपप्रमुख कविता विष्ट, वडाध्यक्ष प्रकाश रावल, विनोदकुमार विकको सहभागिता थियो । औषधि वितरण बडिमालिका नगरपालिकाको सहयोगमा गरिएको छ । (रासस)
