प्रकाश डोटेल-स्याङ्जा, १ असार : स्याङ्जाको वालिङमा लोपोन्मुख अवस्थामा रहेको सुँगुरे भालु भेटिएको डिभिजन वन कार्यालय स्याङजाले जनाएको छ । सुँगुरको जस्तै लामो थुतुनो, शरीरभरि बाक्ला, लामा काला र सेता धर्से रौं र लामा नङग्रासहितको वन्यजन्तु बस्ति नजिक आएपछि गाउँलेले समाएर वन कार्यालयमा खबर गरेका हुन् ।
भालु वालिङ् नगरपालिका–११ को तल्लो पेखु ओराले भन्ने ठाउँमा बारीका भेटिएको स्थानीयले जानकारी दिएका छन् । घर नजिकैको बारीमा हिँडिरहेको देखेपछि स्थानीयले घरमा ल्याउपछि स्थानीय सुरेश अर्यालले वन कार्यालयमा खबर गरेका हुन् ।
अनौठो प्रजातिको वन्यजन्तु देखेपछि स्थानीयले समाएर घरमा ल्याएर दूध खुवाएर राखे । ७ घण्टा स्थानीय नियन्त्रणमा राखेकोे भालुलाई आइतबार साँझ भेटिएको स्थान नजिकैको पेखु सामुदायिक वनमा छाडिएको डिभिजन वन कार्यालय स्याङ्जाका प्रमुख कोमलराज काफ्लेले जानकारी दिए ।
“सुँगुरे भालु स्याङ्जामा पहिलो पटक देखिएको हो ।” प्रमुख काफ्लेले भने, “नेपालमा पाइने एक दुर्लभ प्रजातिको जनावर हो, अहिले यसलाई दुर्लभ मानिन्छ ।” काफ्लेका अनुसार धु्रवीय भालु पूर्णरुपमा मांशहारी हुन्छ भने यसकै अर्को प्रजाती ठूलो पाण्डा बाँस मात्र खाएर बाँच्ने गर्दछ । यी दुई प्रजातिबाहेक ६ प्रजातिका भालुहरू जसले वनस्पति र जनावर दुबैलाई आफ्नो आहार बनाउने गर्छन् ।
यसको लामो थुतुनो, रौंहरूले ढाकेको खुट्टाहरू, लामा र बलिया नङ्ग्रा भएका पञ्जाहरू र छोटो खालको पुच्छर हुन्छ । भालु एक हिँस्रक तथा खतरनाक जनावर भएको काफ्लेले बताए । काफ्लेका अनुसार भालुहरू एक्लै हिड्ने र एकान्तप्रिय जनावर हुन् । भालुको सुंघ्ने क्षमता तीक्ष्ण हुन्छ । ठूलो र रौं भरिएको भद्दा जीऊ भएपनि छिटोछिटो दौडिन, रुखमा चढ्न र पानीमा पौडिन भालु निपुण हुन्छन् । मानव बस्तीनजिक बस्ने भालुहरू साँझपख र राति पनि सक्रिय हुने गर्छन । यिनीहरु गुफा र खाडलहरूमा बस्ने गर्दछन् ।
विभिन्न जातजाती र समुदायहरूको कला, धर्म र सांस्कृतिक सम्पदामा भालुको महत्वपूर्ण भूमिका रहन्छ । मानिसले अनावश्यक हस्तक्षेपका कारण भालु लोप हुने अवस्थामा पुगेको छ । भालुको छाला, भुत्ला र औषधियुक्त गुण भएको पित्त लगायत विभिन्न अंगहरूको समेत अवैद्य व्यापार हुने गरेको छ ।
