मेरो एउटा साथी छ

पृथ्बीतलकै कुनै सुन्दर देशमा मेरो

एउटा साथी छ

र, थाहापाइराखौं धरतीमै उ सबैभन्दा माथि छ ॥

उचाइ उसको ​ शगरमाथा शीर​ भन्दा अग्लो

सोचाइ उसको महाशागरीय छाल भन्दा सग्लो

रफ्तार उसको कुन अन्तरिक्ष यानले भेट्न सक्छ ?

दृष्टिको त के कुरा सात समुन्द्रपारी देख्न सक्छ !॥१॥

जुन र तारा हातकै खेला, सिंगै पहाड बोक्न सक्छ

आँटे उसले दुई कोरिया पलमै जोड्न कसले रोक्छ

उ लाग्दा लिपुलेक क्षणभरमै दिलाउन सक्छ

चिरिएको नेपाली छाति बुट्टाहाली सिलाउन सक्छ ॥२॥

कार्लमाक्सको लगौंटिया, डार्बिन बच्चैमा चिनेको रे

चन्द्रमामा घडेरी त पोहोर​ साल मात्रै किनेको रे

सिजिनपिङ संग घट्टाग​ई भारी संगै पिनेको रे

ट्रम्पको बिहे त उस्ले आफैं कन्या खोजी छिनेको रे ॥३॥

यस्तो महान् भइकन ​ उ मेरो असाध्यै ख्याल गर्छ

धेरै होइन दैनिक बीसचोटी मेरो फेसबुक वाल हेर्छ

हरेक पोष्ट र कमेन्टमा उसकै नजर पहिले आउँछ

मैले उछिन्ला, हरे चिन्ता मेरै, लाउनु खवरदारी लाउँछ ॥४॥

आफू टन्न​ नअघाएसम्म कसैले खाँदै नखानु भन्छ

उस्लाई उछिनी नपुगेको ठाउँमा अरु जांदै नजानु भन्छ

उसले जाने जति कुरा अरु कसैले नजानून भन्छ

उसले बोलेको बचन सबले अक्षरस​ मानून भन्छ ॥५॥

राष्ट्रप्रमुखले निर्णय गर्दा उसैलाई पहिले सोधून् भन्छ

प्रतिपक्षले विरोध गर्दा उसैलाई पहिले खोजून् भन्छ

उसलाई नसोधि कसैले सिन्को सम्मपनि नदिनु भन्छ

उसले नभने सम्म​ अरुले स्वास पनि नलिनु भन्छ ॥६॥

बादलमुनीको सुन्दर​ देशमा मेरो एउटा​ साथी छ

थाहाभयो होला अब​ धरतीमा उ सबैभन्दा माथि छ ॥ …………………………………………………………………