लहान, ३ साउन : नियुक्त भएको केही दिनमै लहानस्थित पशुपति आदर्श माध्यमिक विद्यालय व्यवस्थापन समितिका अध्यक्ष राकेश रोशन गुप्ताले पदबाट राजीनामा दिएका छन् । लहान नगरपालिकाको शिक्षा समितिले विद्यालय व्यवस्थापन समितिको अध्यक्षमा वडा नं ७ का वडाध्यक्षसमेत रहनुभएका गुप्तालाई अघिल्लो साता नियुक्त गरेको थियो । नियुक्त भएको एक साता नबित्दै गुप्ताले विद्यालय व्यवस्थापन समितिको अध्यक्ष पदबाट राजीनामा दिएका छन् ।
गुप्ताले सामाजिक सञ्जाल फेसबुकमार्फत राजीनामाको घोषणा गर्दै आफू विद्यालय व्यवस्थापन समितिमा वडाध्यक्षको हैसियतले पदीय जिम्मेवारी वहन गर्ने उल्लेख गरेका छन् । वडाध्यक्षको रूपमा विद्यालय व्यवस्थापन समितिको पदेन सदस्यको जिम्मेवारी अझै रहेको भन्दै विद्यालय व्यवस्थापन समितिको अध्यक्ष पदमा अरु नै कुनै योग्य व्यक्तिलाई छनोट गर्न राजीनामा दिएको गुप्ताले जानकारी दिए ।रासस/File Photo
