काठमाडौं, साउन २८ । भारतका लागि पूर्व नेपाली राजदूत दिपकुमार उपाध्यायले नेपालको तर्फबाट कुटनीतिक कमजोरी भएको सरकारले महसुस गरेको बताएका छन् ।
सरकारका उच्च अधिकारीहरुसँगका बैठक तथा कुराकानीका क्रममा आफुले गल्ती भएको महसुस नेपाल सरकारले पनि गरेको पाएको जानकारी उनको भनाई छ ।
पत्रकार ऋषि धमलासंगको कुराकानीमा उनले भने, ‘हाम्रो तर्फबाट पनि केही कमीकमजोरी भएका छन् । त्यो कुरा नेपाल सरकारकाले पनि महसुस गरेको छ । अव समस्याको समाधानका लागि बाटो खुल्नसक्छ ।’
दुई देशका बीचमा विवाद हुनुमा भारतले पनि कहीँ न कहीँ आफ्नो गल्ती महसुस गरेको पाएको उनको भनाई छ । ‘नेपाल र भारतका बीचमा विवाद हुनु दुवै देशको कुटनीतिक असफलता हो, त्यसमा नेपालका प्रधानमन्त्री केपी ओली र भारतका प्रधानमन्त्री नरेन्द्र मोदीको कमजोरी देखिन्छ,’ उनले भने ।
नेपालको तर्फबाट भारतसँगको सम्वन्धलाई ख्यालठट्टा गरेर विगारिएकोसमेत उनको दाबी छ । पूर्व राजदूत उपाध्यायले पहिला पहिला दुई देशका बीचमा विवाद भइरहेका बेला पनि कुराकानी भइरहने गरेको स्मरण गर्दै अहिले भने त्यो पनि हुन नसकेको जनाए ।
नेपाल र भारतका बीचमा सम्वन्ध विग्रिदा भारतलाई भन्दा नेपाललाई बढी समस्या पर्ने र सरकारलाई भन्दा जनतालाई समस्या पर्ने उनको भनाई छ ।
नेपाल र नेपालीलाई बढी समस्या पर्ने भएकाले समाधानको प्रयास पनि नेपालकै तर्फबाट धेरै हुनु पर्नेमा उनले जोड दिए ।
