सिन्धुली, १४ भाद्र । अपहरण गरेको अभियोगमा प्रतिमा परियारलाई शनिबार दिउँसो प्रहरीले पक्राउ गरेको छ । तिनपाटन गाउँपालिका तिल्पुङडांडास्थित भिमसेन नि.मा.वि.का प्रधानाध्यापकलाई अपहरण गरेको अभियोगमा सुनसरी धरान सिमलचोककी २० वर्षीया परियार थरकी युवती पक्राउ परेकी हुन् ।
स्कुलमा छात्रवृत्ती बाँडिरहेको अवस्थामा प्रधानाध्यापक नारायण भण्डारीलाई १० र १२ जनाको समूहले अपहरण गरेको भन्ने खबर प्राप्त हुनासाथ जिल्ला प्रहरी कार्यालय समेतबाट खटिएको प्रहरीले सोही ठाउँस्थित लायोगाउँको खानीपाखा जंगलबाट भण्डारीलाई स–कुशल फेला पारी उद्धार गरेको हो ।
प्रतिमाको साथबाट २ वटा खाली सकेट बम र १ थान सुतली बम बरामद भएको घटनामा संलग्न अन्य व्यक्तिहरुको प्रहरीले खोजी गर्नुका साथै यस सम्बन्धमा प्रहरीले थप अनुसन्धान गरिरहेको छ ।
