यस्तो महामारीको बीचमा पनि सरकारले काम गरिरहेको छ : खनाल

सत्तारूढ दल नेपाल कम्युनिष्ट पार्टी (नेकपा) का स्थायी कमिटी सदस्य तथा पूर्वमन्त्री चक्रपाणि खनालले वर्तमान सरकारले कोरोना महामारीको बीचमा पनि काम गरिरहेको बताउँदै जनताका समस्याप्रति सरकार गम्भीर भएको दाबी गरेका छन् । उनले उपाध्यक्ष वामदेव गौतम राष्ट्रियसभामा मनोनित हुने र छिट्टै मन्त्री बन्नेपनि सुनाए । गौतमलाई मन्त्री बनाउनको लागि अध्यक्षद्धय केपी शर्मा ओली र पुष्पकमल दाहालबीच पछिल्लो समय कुराकानी भैरहेको उनले स्पष्ट पारे । आज विहान नेपाली रेडियो नेटवर्कबाट प्रसारण भएको नेपाली बहस कार्यक्रममा पत्रकार ऋषि धमलासँग कुरा गर्दै उनले यस्तो बताएका हुन् । प्रस्तुत छ नेता खनालसँग पत्रकार धमलाले गरेको कुराकानीको सम्पादित अंश :

तपाईहरू सरकारमा हुनुहुन्छ, किसानहरूले मल पाउँदैनन् । किन यस्तो दुर्दशा देशको ?

मलको अहिले अलि अभाव नै देखियो । सरकारमा पनि छौँ, त्यो कुरा पनि मानियो । तर पनि मलको समस्या छ । किसानहरूले अलि मलको चर्को नै समस्या झेलिरहेका छन् भन्ने सुनिराखिएको छ ।

सुनिमात्र रहनुभएको छ, लाईन बसेको तस्वीरहरू हेर्नुभएन ? १० देखि २० घन्टा लाईन बसेका किसनाहरूको पीडा तपाईहरुले देख्नुभएको छैन् ?

हाम्रो जिल्लामा पनि मलको बारेमा हिजो सानो मिटिंग गरेका थियौँ, कसरी यसलाई समाधान गर्ने भनेर । हुन त मलको समयमा कहिलेकाहीँ टेन्डरमा आउँदा अथवा समयमा मल नआउँदा केही न केही समस्या त हुने गरेको हो । सायद अहिले कोरोनाको कारण हो कि बढि, अहिले मल यो बीचमा नआएको जस्तो बुझियो अथवा केही टेन्डरको ढिलासुस्तीको कारणले हो या यो कोरोनाको कारणले हो, कतै रोकियो जस्तो लाग्छ । चैत मसान्तसम्म त म मन्त्रीबाट हट्नुभन्दा पहिले नै व्यवस्थापन भईसकेको थियो । त्यसपछि लगत्तै टेन्डर हुनुपर्ने हो, टेन्डर भएको भनेर पनि सुनेको हो मैले, सायद कहाँनेर के नमिलेर मल पाइँएन ।

मल आयातमा एकदमै बढि लापरबाही भयो भन्ने कुरा आएको छ नि ?
अ

लिकति नपुग हाम्रो अनुदानको पैसा जति हामीले छुट्याएका छौँ, प्रत्येक आर्थिक वर्षमा पर्याप्त मल अहिले जति किसानले माग गरिरहेका छन्, हाम्रो उत्पादन बढिरहेको छ, त्यो हिसाबले मल हामीलाई पुग्दैन नै । अहिले नपुग्नेभन्दा पनि कता कता मलाई लाग्छ, समयमा मल आएन कि, त्यो आउनुपथ्र्यो, त्यो पनि आएन कि, त्यो अध्ययन गर्नुपर्छ ।

आज देशमा निषेधाज्ञा छ, समस्या छ, जताततै, गरिब जनताले खान पाएका छैनन्, नेताहरू सिंहदरबारमा । अनि तपाईहरू कहिल्यै पनि गरिबहरूको पक्षमा एक शब्द नबोल्ने, काम पनि नगर्ने, किन यस्तो भईरहेको छ ?

यो कोरोनाको स्थिति सरकारले ल्याएको त होइन नि त ।

होइन, सरकारले ल्याएको होइन तर सरकारले जनताहरूलाई खुवाउनु पर्छ नि त । जनतालाई खान दिनुपर्छ कि पर्दैन ? सरकारको दायित्व हो कि होइन ?

सरकारले त्यो गर्छ । हामीले उत्पादनलाई जोड दिनुपनि पर्छ । त्यसको लागि आधारभूत कुराहरू जुन सरकारले लिएको छ, त्यो पनि गर्नुपर्छ । व्यक्तिले जिम्मा लिएको कुरा व्यक्तिले पनि पूरा गर्दै जाने कुरा छँदैछन् । तर अहिले जुन मूल समस्या छ, किसानले समयमा मल नपाएको कारणले जुन स्थिति पैदा भएको छ, यो एउटा विषय हो । कोरोनाको कारणले विश्वमै समस्याहरू उब्जिएका छन्, त्यसलाई फरक नजरले हेर्नुपर्छ भन्ने मलाई लाग्छ ।

गरिब जनता यतिखेर टुँडिखेलमा खान नपाएर छटपटाईरहेका छन् । सरकारले हेर्नुपर्दैन ?

त्यो पनि सरकारले हेर्नुपर्छ ।

जनतालाई राहत दिनुपर्दैन ?

स्थानीय तहसम्मै राहतका प्याकेजहरू गईरहेका छन् । विभिन्न एन.जी.ओ. हरू खटेका छन् । यस्तो चरम अभाव नेपालमा होइन । सामान्य केही कुराहरू होलान्, त्यो फरक प्रसंग हो ।

तपाई टुँडिखेलमा जानुस् हेर्न । खुलामञ्चको तस्वीर । लाईन बसेका छन्, जनता, घन्टौँ खान नपाएर । सरकार के हेरेर बसेको छ ?

त्यसलाई पनि सरकारले हेर्नुपर्छ । त्यसको व्यवस्थापन गर्नुपर्छ । तर अहिले उठाईएको जुन विषय छ, यो एकदम उपयुक्त विषय हो । कुरा उठाउने मात्र होइन कि यो सरकारले गम्भीरताका साथ लिनुपर्छ भन्ने मेरो पनि मत हो ।

अब वामदेव गौतम राष्ट्रिय सभाको सांसद बन्ने पक्का भयो होईन ?

हो ।

उपप्रधानमन्त्री पनि, अर्थमन्त्री पनि उहाँ नै बन्ने हो ?

त्यो छलफल चलिरहेको छ । उहाँलाई राष्ट्रिय सभामा लैजाने कुरा पहिलेको निर्णय हो । अहिले त्यसलाई कार्यान्वयन गर्ने मात्र कुरा हो । किनभनेदेखि यो अहिलेको निर्णय होइन । तर पटक÷पटक वामदेव कमरेडले पटक–पटक कुराहरू परिवर्तन गरिरहनु हुन्छ, कहिले चुनाव लड्छु भन्नुहुन्छ, कहिले जान्न राष्ट्रिय सभामा भन्नुहुन्छ, यस्तो लगातार उहाँले पनि गर्नुभएन । उहाँसम्मको लिडरलाई फेरि म मन्त्रालयको जिम्मा लिन्छु भन्दा उहाँलाई नदिने कुरा पनि भएन । उहाँलाई त्यो व्यवस्था गर्छ, पार्टीले । मलाई लाग्छ, त्यो कुरा अहिले ठिकै ठाउँमा उठेको छ । मन्त्रीको लागि दुई जना अध्यक्षको बीचमा कुराकानी चलिरहेको छ । त्यो सायद छिट्टै टुँगिन्छ होला ।

भागबण्डा हुँदाखेरि तपाईहरूबाट प्रधानमन्त्री के.पी. शर्मा ओलीलाई कमजोर बनाउने खेल हुँदैन?

होइन, हुँदैन, किन हुनु ? कमजोरभन्दा पनि त्यतिखेर हाम्रो स्पिड मिलेन । हामी त राजीनामा दिन पनि तयार भएको मन्त्री हौँ । उहाँलाई झन सफल बनाउने हाम्रो एकताको सरकार हो । अध्यक्षको नेतृत्वमा बनेको सरकारलाई कसले असहयोग गर्छ ?

तर सरकारले काम गर्न सकेन नि त । जनताको प्रश्नहरू धेरै छन् नि । सरकार असफल भयो भनेर कुरा उठिसक्यो ?

यो साँच्चै हो कि होइन भन्ने कुरा त आगामी दिनमा पस्किँदै जाला । यस्तो महामारीको बीचमा पनि सरकारले काम गरिरहेको छ । त्यो कुरा त सत्य हो नि ।

त्यसोभए कृषिमन्त्री घनश्याम भुषाल सफल हो त ?

त्यो त मैले मूल्याकंन गर्ने होइन नि त, प्रधानमन्त्रीले हो । अरूले मूल्याकंन गर्ने हो, मैले होइन, सफल, असफल भनेर । तर अहिले काम गरिरहनुभएको छ । १ वर्ष पनि पुगेको छैन । यो स्थितिमा योजनाहरू अगाडि बढाईरहनुभएको छ । FILE PHOTO