एजेन्सी, ११ असोज । युक्रेनमा भएको एक सैनिक विमान दुर्घटनामा कम्तिमा बाइस जनाको ज्यान गएको छ । मारिने मध्ये अधिकाश वायु सैनिक भएको सुरक्षा श्रोतले पुष्टि गरेको छ । अवतरणको क्रममा पुर्वी शहर खार्किभ नजिक एन्टोनोभ –२६ विमान दुर्घटनाग्रस्त भएको हो ।
सो विमान खार्किभ एयर फोर्स युनिभर्सिटीका क्याडेटहरुलाई बोकेर नियमित तालिम उडानमा निस्केको थियो । आपतकालिन मन्त्रालयले त्यसमा कूल सत्ताइस व्यक्ति सवार रहेको जनाएको छ । दुई व्यक्तिको अवस्था निकै चिन्ताजनक रहेको तथा हराइ रहेका तीनजनाको खोजि कार्य जारी रहेको बताइएको छ । दुर्घटनाको कारण पत्ता लगाउने कोशिस भइरहेको छ ।
आपतकालिन मन्त्रालयका अधिकारीहरुले चुहुइभ शहर स्थित सैनिक विमानस्थल देखि करिव दुई किलोमिटर टाढा सो विमान दुर्घटनाग्रस्त भएर खसेको हो । यो दुर्घटना पुर्वी युक्रनेको द्वन्द्वसंग सम्बन्धित रहेको वा नरहेको भन्ने स्पष्ट हुन सकेको छैन ।
चुहुइभ युक्रेनी सरकारी फोज रुस समर्थित पृथकतावादीहरु विरुद्ध लडिरहेको अग्र मोर्चाभन्दा करि एक सय किलो मिटरको दूरीमा रहेको छ । दुर्घटना स्थल वरपर लागेको आगो नियन्त्रणमा लिइसकेको छ । शनिवार युक्रेनका राष्ट्रपति भोलोदिमिर जेलेम्सकी सो क्षेत्रमा पुग्ने कार्यक्रम रहेको छ ।
प्रारम्भिक सुचनालाई उदरित गर्दै खार्किभ क्षेत्रिय गवर्नर ओलेक्सि कुचरले विमानका एकजना पायलटले दुर्घटना हुनु केहि समय अघि एउटा इन्जिनले काम गर्न छाडेको बताएको जनाएका छन् । इन्टरफ्याक्स – युक्रेन समाचार निकायका अनुसार एकजना प्रत्यक्षदर्शीले जिउभरि आगो लागेका एक व्यक्ति भग्नावशेषबाट उठेर भागेको कुरा रोयटर्सलाई बताएका खबर आजको समाचारपत्रले प्रकाशन गरेको छ ।
