वीरगंज, १३ कात्तिक । जिल्ला न्यायाधिवक्ताको कार्यालयको निर्देशनमा एक सातापछि प्रहरीले मुकेश चौरसिया हत्याकाण्डको जाहेरी दर्ता गरेको छ । बुधवारदेखि जिल्ला न्यायाधिवक्ताको कार्यालय सञ्चालनमा आएपछि नेकपाका नेता, कार्यकर्ताहरुले उजूरी दर्ता गरिदिन आग्रह गरेपछि जाहेरी दर्ता भएको बताइएको छ ।
जिल्ला प्रहरी कार्यालय, पर्साले १२ जनाविरूद्ध परेको कर्तव्य ज्यानको जाहेरी मुद्दा दर्ता भएको जानकारी गराएको छ ।
नेकपा विन्ध्यवासिनीका सचिव मुकेश चौरसिया झडपमा परी घाइते भएको र भोलिपल्ट उनको निधन भएको थियो । त्यसपछि उनको हत्यामा संलग्न भएकाहरुलाई कारबाईको माग गर्दै गर्दै जाहेरी दिएपनि जिप्रका, पर्साले मुद्दा दर्ता गराएको थिएन । घटना भएको सात दिनपछि जिल्ला न्यायाधिवक्ताको कार्यालयको निर्देशनमा मुद्दा दर्ता भएको जिप्रका, पर्साले जनाएको छ ।
यसअघि बुधवारपनि नेकपाका नेता, कार्यकर्ताहरुले प्रदर्शन गर्दै सडक अवरुद्ध गरेका थिए । घटनामा संलग्न रहेका तीनजनालाई प्रहरीले पक्राउ गरेको छ ।
