काठमाडौँ, १५ कार्तिक। चालु आर्थिक वर्षको पहिलो त्रैमासमा नेपाल बैंक (NBL) को खुद नाफा घटेको छ। बैंकको खुद ब्याज आम्दानी, सञ्चालन मुनाफा बढेपनि बैंकले डिफर्ड ट्याक्स (स्थगित कर) तिर्दा बैंकको नाफा घटेको हो।
गत आर्थिक वर्षको पहिलो त्रैमासमा ५८ करोड १८ लाख रुपैयाँ खुद नाफा गरेको बैंकले चालु आर्थिक वर्षको सोहि अवधिमा ५५ करोड ४ लाख रुपैयाँ खुद नाफा कमाएको छ। यो गत वर्षकाे तुलनामा ३ करोड १४ लाख रुपैयाँले कम हो।
बैंकले चालु आर्थिक वर्षको पहिलो त्रैमासमा कमाएको कर अघिको नाफा गत वर्ष तुलनामा बढी भए पनि यस अवधिमा बैंकले गत वर्षको तुलनामा बढी कर तिर्नु पर्दा उसको नाफा घटेको हो। बैंकले यस अवधिमा २० करोड १६ लाख वर्तमान कर तिरेको छ भने २ करोड ९३ लाख स्थगित गर तिरेको छ।
पहिलो त्रैमासमा बैंकको वितरणयाेग्य नाफा १९ करोड ६४ लाख रुपैयाँ रहेको छ।
यस अवधिमा बैंकले १ अर्ब ४८ करोड रुपैयाँ खुद ब्याज आम्दानी गरेको छ। गत वर्षको यसै अवधिमा १ अर्ब ३२ करोड रुपैयाँ खुद ब्याज आम्दानी गरेको बैंकले यस वर्ष यस्तो आम्दानी झण्डै १६ करोड रुपैयाँले बढाएको छ।
बैंकको अन्य सञ्चालन आम्दानी पनि बढेको छ। गत वर्षको तुलनामा बैंकको अन्य सञ्चालन आम्दानी ४ करोड १० लाखबाट बढेर ५ करोड १ लाख रुपैयाँ पुगेको छ।
बैंकले गत वर्षको तुलनामा खर्च पनि नियन्त्रण गर्दै लगेको छ। बैंकको कर्मचारी खर्च ६७ करोड रुपैयाँबाट घटेर ६५ करोड रुपैयाँमा झरेको छ भने अन्य सञ्चालन खर्च १९ करोडबाट घटेर १७ करोडमा झरेको छ।
गत वर्षको तुलनामा बैंकको खराब कर्जा भने बढेको छ। यस अवधिमा बैंकको खराब कर्जा २.७५ प्रतिशतबाट बढेर ३.०२ प्रतिशत पुगेको छ। बैंकले आगामी दिनमा खराब कर्जा नियन्त्रणमा भने ध्यान दिनुपर्ने देखिन्छ।
बैंकको पूँजीकोष अनुपात १७.०३ प्रतिशत रहेको छ भने सिसिडि रेशियो ६६.५४ प्रतिशतमा झरेको छ। यस अवधिमा बैंकको आधार दर ६.८१ प्रतिशत छ भने स्प्रेड दर ४.३८ प्रतिशत छ।
बैंकको वार्षिक प्रतिशेयर आम्दानी १९ रुपैयाँ ५१ पैसा रहेको छ भने प्रतिशेयर नेटवर्थ २७२ रुपैयाँ ४९ पैसा र मूल्य आम्दानी अनुपात १६.६० गुणा छ।-मेरोलगानी/File Photo
