काठमाडौं, १६ कात्तिक । अवैध लागूऔषध सहित युवा पक्राउ परेका छन् । मेचीनगर नगरपालिका–६ बाट २६ ग्राम अवैध लागूऔषध ब्राउनसुगर जस्तो देखिने पदार्थ सहित भारत दार्जिलिङ पश्चिम वंगाल बस्ने २५ वर्षीय साधिक आलमलाई शनिबार दिउँसो प्रहरीले पक्राउ गरेको छ ।
लागूऔषध नियन्त्रण व्यूरो काकँडभिट्टाबाट खटिएको प्रहरीले उनलाई उक्त पदार्थ सहित फेला पारी पक्राउ गरेको जनाएको छ ।
महोत्तरीको सम्सी गाउँपालिका–६ सम्सी बजारबाट नियन्त्रित लागूऔषध सहित २ जनालाई शनिबार साँझ प्रहरीले पक्राउ गरेको छ । पक्राउ पर्नेहरुमा धनुषा मिथिला नगरपालिका–७ ढल्केबर बस्ने २४ वर्षीय मुक्त्ति कुमार बुढाथोकी र महोत्तरी बर्दिबास नगरपालिका–३ गौरीडाँडा बस्ने २४ वर्षीय रण बहादुर ठारा मगर रहेका छन् ।
भारतबाट नेपालतर्फ आउँदै गरेको प्रदेश २–०२–००१ प ५०१३ नम्बरको मोटरसाइकललाई प्रहरी चौकी सम्सीबाट खटिएको प्रहरीले जाँच गर्दा मोटरसाइकल चालक बुढाथोकीको साथबाट ६ सय थान नाइट्राभेट र मगरको साथबाट ३० ट्याब्लेट नाइट्रोभेट, १० ट्याब्लेट नाइट्राजेपाम र २४ ट्याब्लेट स्पास्मो प्रोक्सभिन फेला पारी बरामद गरेको बताएको छ ।
यस्तै बाँकेको राप्तीसोनारी गाउँपालिका–१ शिवखोलाबाट करिब ३ किलो अवैध लागूऔषध अफिम सहित रुकुम सानिभेरी गाउँपालिका–८ बस्ने २७ वर्षीय चन्द्र प्रकाश वलीलाई शनिबार दिउँसो प्रहरीले पक्राउ गरेको छ ।
जिल्ला प्रहरी कार्यालय बाँके र लागूऔषध नियन्त्रण ब्युरो नेपालगंजबाट खटिएको प्रहरीले उक्त अफिम सहित फेला पारी उनलाई पक्राउ गरेको जनाएको छ । यस सम्बन्धमा स्थानीय प्रहरीले थप अनुसन्धान गरिरहेको बताएको छ ।
