काठमाडौं, २६ कात्तिक । हास्यव्यंग क्षेत्र हुँदै नेपाली चलचित्रमा प्रवेश गरेका निर्देशक तथा कलाकार दीपकराज गिरी फार्म हाउस खोल्ने तयारी गर्दै छन् । ‘छक्का पञ्जा’ सिरिजले सफलता पाएसँगै नेपालमा फार्म हाउसमा लगानी गर्ने पहिलो कलाकारको रुपमा गिरीले पहिचान बनाउँदै छन् । फार्म हाउसमा ५ करोड लागत लाग्ने प्रारम्भिक अनुमान गरेका दीपक ३ महिनादेखि यसै काममा व्यस्त छन् ।
फार्ममा ७–८ जनासम्म बस्न मिल्ने ३० वटा साना–साना घर, सभा, सेमिनार लगायतको कार्यक्रम गर्नका लागि डेढ सय जना अट्ने सभा हल बनाउने जनाइएको छ । त्यसबाहेक १ बिगाहा जग्गा कृषि सम्बन्धि काम गर्नको लागि छुट्टाइने पनि बताइएको छ ।
१० रोपनी आफ्नो जग्गा, दाजुभाईहरुको सम्पत्ति र केही जग्गा खरिद गरेर फार्म हाउस खोल्न लागेका दीपकराजलाई काम सकिन करीब २ वर्ष लाग्नेछ । कोरोना भाइरसको कारण फिल्म निर्माणका कार्य बन्द भएकोले उनले वैकल्पिक पेशाको रुपमा फार्म हाउसलाई अगाडी बढाएका हुन् ।
