काठमाडौं, १४ मंसिर । अवैध लागूऔषध सहित २४ वर्षीय युवा पक्राउ परेका छन् । भक्तपुर नगरपालिका–१० कमलबिनायकस्थित पाइपलाईनबाट १ किलो ५ सय ग्राम अवैध लागूऔषध गाँजा सहित सोही नगरपालिका–६ भोलाछेँ बस्ने २४ वर्षीय कान्छा सिजखुलाई शनिबार बेलुका प्रहरीले पक्राउ गरेको हो ।
महानगरीय प्रहरी प्रभाग खरिपाटीबाट खटिएको प्रहरीले कान्छालाई उक्त परिमाणको लागूऔषध गाँजा सहित फेला पारी पक्राउ गरेको बताएको छ ।
यस्तै, कैलालीको लम्कीचुहा नगरपालिका–१० सुतैयाबाट ८ ग्राम ३ सय ६० मिलिग्राम अवैध लागूऔषध खैरो हेरोइन सहित भजनी नगरपालिका–५ लालबोझीका धनिराम चौधरीलाई शनिबार दिउँसो प्रहरीले पक्राउ गरेको छ । ईलाका प्रहरी कार्यालय लम्कीबाट खटिएको प्रहरीले धनिरामलाई उक्त परिमाणको लागूऔषध सहित फेला पारी पक्राउ गरेको जनाएको छ ।
