काठमाडौं, मंसिर १६। नेपाली काँग्रेसको क्रियाशील सदस्यताको सबै काम टुङ्गो लगाउन अब १५ दिन मात्रै बाँकीछँदा चार जिल्लामा भने क्रियाशील सदस्यता वितरणको प्रक्रिया नै सुरु भएको छैन ।
आगामी फागुनमा हुने तय भएको १४औँ महाधिवेशनको प्रयोजनका लागि क्रियाशील सदस्यता नवीकरण तथा नयाँ वितरण सक्नुपर्ने समय अवधि मङ्सिर मसान्तसम्म तोकिएको छ । यो अवधिमा सबै जिल्ला कार्यसमितिले क्रियाशील सदस्यता वितरणको सबै प्रक्रिया पूरा गरी त्यसको अन्तिम विवरण केन्द्रमा पठाइसक्नुपर्नेछ ।
पार्टीका मुख्य सचिव कृष्णप्रसाद पौडेलले विभिन्न कारणले अझै चार जिल्लामा क्रियाशील सदस्यता नवीकरण तथा नयाँ वितरणका लागि फाराम लैजान बाँकी रहेको जानकारी दिए । ती चार जिल्ला बारा, सप्तरी, सिन्धुपाल्चोक र सोलुखुम्बु छन् । तीन जिल्लाको समायोजन बाँकी छ भने सोलुखुम्बुको आन्तरिक विवादका कारण केन्द्रले नै क्रियाशील सदस्यताको फाराम लैजान रोकेको भनाइ जिल्लाका नेताको छ ।
अझै आठ जिल्लाले नयाँ क्रियाशील सदस्यता वितरणका लागि थप फाराम नै लान बाँकी रहेको आजको गोरखापत्र दैनिकमा खवर छ ।
