काठमाडौं, १० पौष । बागमती प्रदेशका मुख्यमन्त्री डोरमणि पौडेलविरुद्ध अविश्वासको प्रस्ताव दर्ता भएको छ । आज सत्तारुढ नेपाल कम्युनिस्ट पार्टीका प्रचण्ड पक्षीय प्रदेशसभा सदस्यहरुले आज पौडेलविरुद्ध अविश्वासको प्रस्ताव दर्ता गरेका हुन् ।
अविश्वासको प्रस्ताव दर्ता गर्नेमा ४५ जना प्रदेशसभा सदस्यहरु छन् । उनीहरु हस्ताक्षरसहित विहान प्रदेशसभाको सचिवालय पुगेका थिए । अविश्वासको प्रस्तावकमा प्रदेशसभाका आन्तरिक मामला तथा कानुनमन्त्री शालिकराम जमरकट्टेल छन् । उनले आजै पदबाट राजीनामा दिएर अविश्वासको प्रस्ताव दर्ता गराएका हुन् ।
बागमती प्रदेशसभामा एक सय १० सदस्य छन् । बहुमतका लागि ५६ सदस्य आवश्यक पर्छ । आज अविश्वासको प्रस्ताव दर्तासँगै मुख्यमन्त्री पौडेल अल्पमतमा परेका छन् । अब उनले बहुमतका लागि अन्य दलको साथ लिनुपर्ने हुन्छ ।
यसैगरी, बागमती प्रदेशका आन्तरिक मामलामन्त्री शालिकराम जमरकट्टेलका अलावा सामाजिक विकासमन्त्री युवराज दुलाल र उद्दोगमन्त्री अरुण नेपालले पनि आजै राजीनामा दिएका छन् । उनीहरु सबै प्रचण्ड र माधवकुमार नेपाल पक्षधरका हुन् ।
नेपाल कम्युनिस्ट पार्टी फुटेपछि पौडेलविरुद्ध अविश्वासको प्रस्ताव दर्ता भएको हो । यसले फुटको असर तल्लो निकायसम्म पर्न थालेको स्पष्ट भएको छ । पौडेल प्रधानमन्त्री केपी शर्मा ओली पक्षधर हुन् ।
