काठमाडौं, माघ १ । परराष्ट्रमन्त्री प्रदीपकुमार ज्ञवाली भारत भ्रमणका लागि बिहीबार त्यसतर्फ जाँदैछन् । कतिपय जानकारले मन्त्री ज्ञवालीको भ्रमण समय अनुकूल नभएको टिप्पणी गरेका छन् । कतिपयले भ्रमण गरे पनि दुईपक्षीय महत्वपूर्ण सम्झौता नगर्न सुझाव दिएका छन् ।
मन्त्री ज्ञवालीको भ्रमणप्रति ध्यानाकर्षण भएको जनाउँदै अख्तियार दुरुपयोग अनुसन्धान आयोगका पूर्वप्रमुख, कूटनीतिक क्षेत्रका जानकार, बुद्धिजीवीलगायतको समूहले बुधबार विज्ञप्ति जारी गरी महत्वपूर्ण सम्झौता नगर्न सचेत गराएको छ । ‘परराष्ट्र मन्त्रालयले विज्ञप्ति जारी गर्दै परराष्ट्रमन्त्रीले नेपाल–भारत संयुक्त आयोगको बैठकमा भाग लिन माघ १ देखि ३ गतेसम्म भारत भ्रमण गर्ने उल्लेख गरेको बेहोराप्रति हाम्रो ध्यानाकर्षण भएको छ,’ विज्ञप्तिमा छ ।
उक्त समूहले सीमा विवादलगायतका कारण भारतसँग चिसिएको सम्बन्धलाई पुनः सम्मानजनक अवस्थामा पु¥याउन र कोभिड–१९ विरूद्धको भ्याक्सिन प्राप्त गर्न भ्रमण फलदायी हुन सक्ने तर महत्वपूर्ण सम्झौता गर्न नहुनेमा ध्यानाकर्षण गराएको छ । मुलुकको राजनीति तरल अवस्थामा भएका बेला राजनीतिक नेतृत्व अनेक प्रकारको चाप र दबाबमा रहने र आफ्नै कमजोरीबाट एकपक्षीय वा असमान लाभ उठाउन बाह्यपक्ष सक्रिय रहने भन्दै समूहले यसतर्फ परराष्ट्रमन्त्रीलाई सचेत गराएको छ ।
‘यस पृष्ठभूमिमा भ्रमणमा जानु नै पर्ने कूटनीतिक प्रतिबद्धताको अवस्था हो भने बृहत्तर राष्ट्रिय सहमतिबिना कुनै पनि राष्ट्रिय सरोकारका मामिलामा मुलुकलाई न्यून लाभ हुने वा तत्काल न्यूनाधिक लाभ हुनेजस्तो देखिए पनि दीर्घकालमा त्यसबाट क्षति पुग्ने वा गम्भीर दायित्व सिर्जना हुनेगरी सहमति जनाउने वा समझदारी गर्ने वा त्यसप्रकारको कुनै पनि दस्तावेजमा हस्ताक्षर गर्नेजस्ता कामकारबाही नगर्नका लागि हामी सरकारको गम्भीर ध्यानाकर्षण गछौं,’ विज्ञप्तिमा लेखिएको छ ।
