काठमाडौं, माघ १५ । जोखिम मोलेर कोरोना महामारीविरुद्ध अग्रपंक्तिमा खटिने प्रहरीलाई कोरोना खोप वितरणमा सरकारले विभेद गरेको छ । स्वास्थ्यकर्मी जत्तिकै फ्रन्टलाइनमै खटिने भए पनि प्रहरीलाई कसरी र कहिले खोप लगाउने भन्ने विषयमा सरकारले सूचीसमेत तयार पारेको छैन ।
सरकारले पहिलो चरणमा स्वास्थ्यकर्मीलाई कोभिड खोप लगाउने भन्दै बुधबारदेखि खोप अभियान सुरु गरेको छ । परिचालनको हिसाबमा अग्रपंक्तिमा रहने प्रहरीलाई खोप लगाउने सम्बन्धमा भने योजना बनाइएको छैन । सरकारले चासो नदिएपछि जोखिम मोलेर ड्युटीमा खटिने प्रहरीमा निराशा छाएको छ ।
त्यसो त सरकारले कोरोना महामारीको बेला खटिने प्रहरीलाई कोभिड सुरक्षा भत्तासमेत दिएको छैन । २४सै घण्टा जोखिमपूर्ण क्षेत्रमा सुरक्षार्थ खटिँने उनीहरूलाई कोरोना खोप वितरण नहुँदा त्यसले कर्मचारीमा थप जोखिम बढेको छ । लकडाउन खुलेसँगै नेपाल प्रहरी भीडभाड र जोखिमपूर्ण क्षेत्रमा खटिँदै आएको छ । नेपाल प्रहरीका ७ हजारभन्दा बढी कर्मचारीलाई कोरोना संक्रमण भइसकेको छ । केही कार्यालयमा कोरोना थप फैलन सक्ने डर देखिएको छ ।
नेपाल प्रहरीका प्रवक्ता बसन्त कुँवरले प्रहरीले पनि कोरोनाविरुद्ध जोखिम मोलेर काम गरेकाले खोप वितरणमा विभेद नहुनुपर्ने बताए । उनले भने, ‘सुरुमा स्वास्थ्यकर्मीलाई लगाइदिने कुरा हो, त्यसपछि मात्रै प्रहरीको पालो आउला ।’ उनका अनुसार बुधबार नेपाल प्रहरी अस्पताल महाराजगन्जमा कार्यरत स्वास्थ्यकर्मीसहित १ सय ३५ जनालाई कोरोना खोप लगाइएको छ । अस्पतालका मेडिकल डाइरेक्टर प्रहरी अतिरिक्त महानिरीक्षक डा। आशा सिंहले खोप लगाएपछि स्वास्थ्यकर्मीलाई हौसला बढेको बताइन् । नागरिक दैनिकबाट
