नवलपुर, २० माघ: गण्डकी प्रदेशका मुख्यमन्त्री पृथ्वीसुब्बा गुरुङले कम्युनिष्टको शक्ति जनतामा हुने बताएका छन् ।
नवलपरासी (बर्दघाट–सुस्तापूर्व)को गैँडाकोटमा आज आयोजित कार्यकर्ता भेलालाई सम्बोधन गर्दै उनले प्रधानमन्त्री केपी शर्मा ओली नेतृत्वको सरकारलाई नेकपा प्रचण्ड–नेपाल समूहले गिराउन खोजेपछि जनतामाझ जान प्रधानमन्त्रीले संसद् विघटन गरेको स्पष्ट पारे ।
“जनताले हामीलाई पाँच वर्षसम्म स्थिर सरकार बनाउनका लागि म्यान्डेट दिएका थिए”, उनले भने, “विभिन्न षड्यन्त्र गरेर सरकार ढाल्न खोजिएपछि जनताको बीचमा जानुको विकल्प थिएन । त्यसैले प्रधानमन्त्रीले संसद् विघटन गरेका हुन् ।” मुख्यमन्त्री गुरुङको कम्युनिष्टको शक्ति जनतामा हुने भन्दै अब जनतामाझ गएर पुनः सरकारको नेतृत्व गरिने बताए । “गोहीको शक्ति पानीमा, चिलको शक्ति आकाशमा अनि बाघको शक्ति जङ्गलमा भएजस्तै हामी कम्युनिष्टको शक्ति पनि जनतामा रहेको हुन्छ”, उनले भने, “हामीले जनताको लागि धेरै काम गरेका छौँ । बाटोघाटो निर्माण, पानी बत्तीको सुविधा, स्वास्थ्य, शिक्षाको व्यवस्था गरेकाले जनताले फेरि हामीलाई अनुमोदन गर्नुहुनेछ ।”
नेकपाको गण्डकी प्रदेश इञ्चार्जसमेत रहनुभएका मुख्यमन्त्री गुरुङले आफूहरुले पार्टीलाई धेरै पटक दुर्घटना हुनबाट जोगाएको बताउँदै प्रदेश र सङ्घको निर्वाचन सकिएलगत्तै प्रचण्डलगायतका नेताले निहुँ खोजिरहेको भए पनि केही समय आफूहरुले पार्टीलाई फुटबाट जोगाएको दाबी गरे ।-रासस/File Photo
