काठमाडौं, २६ फागुन । माओवादी केन्द्रका पाँच नेताहरु यतिबेला सरकारमा छन् । उनीहरुमध्ये तीन प्रतिनिधि सभा र एकजना राष्ट्रिय सभाका सांसद हुन् । एकजना सांसद छैनन् ।
सबैलाई फर्काउन अध्यक्ष पुष्पकमल दाहाल प्रचण्डको निर्देशनमा नेताहरु सक्रिय भएका छन् । आज प्रवक्ता नारायणकाजी श्रेष्ठले सहरी विकासमन्त्री प्रभु साहलाई फोन नै गरेर पार्टीमा आउन आग्रह गरे । तर, प्रभुले नकारात्मक जवाफ फर्काए ।
प्रतिनिधि सभामा प्रत्यक्ष निर्वाचित सांसदहरु लेखराज भट्ट र गौरीशंकर चौधरीलाई पनि फर्काउन पहल भएको छ । तर, भट्टले सांसद पद गएपनि नफर्कने सार्वजनिक रुपमा बताइसकेका छन् ।
गृहमन्त्री रामबहादुर थापा बादल राष्ट्रिय सभा सांसद हुन् । उनी पनि माओवादी केन्द्रमा नफर्किए सांसद पद नै खारेज हुनसक्छ । तर, बादल कुनै हालतमा नफर्कने बुझिएको छ । बादलनिकट खेलकुदमन्त्री दावा लामाले आफूहरु नफर्कने बताइसकेका छन् । बादललाई नेकपा एमालेमा उपाध्यक्ष बनाउने तयारी भएको बुझिएको छ ।
गौरीशंकर चौधरी पनि मन्त्री छन् । उनलाई पनि फर्काउन पहल सुरु भएको छ । तर, चौधरी पनि नआउने बुझिएको छ ।
माओवादी केन्द्रबाट निर्वाचित बहालवाला सांसदहरु नफर्किए पार्टी परिवर्तन गरेको मानिनेछ । राजनीतिक दलसम्बन्धी ऐनले निर्वाचित सांसद, प्रदेशसभा सांसद या स्थानीय निकायका जनप्रतिनिधिले दल त्याग गरेर स्वतः पद खारेज हुनसक्छ ।
अब चारजना मन्त्रीले तत्काल माओवादी केन्द्रमा नफर्किए संसदीय दलका नेता प्रचण्डले सांसद पद नै खारेज हुने गरी निवेदन दिन सक्छन् । उनीहरु कारबाहीमा परेर सांसद पद खाली हुनसक्छ । यसरी माओवादी केन्द्रका तीनजना प्रतिनिधि सभा र एकजना राष्ट्रिय सभा सांसदको पद धरापमा परेको छ ।
खानेपानी मन्त्री मणि थापा माओवादी केन्द्रमा हुँदा स्थायी कमिटीमा थिए । उनी निर्वाचित जनप्रतिनिधि नभएकाले ढुक्क छन् ।
