काठमाडौं, १९ चैत्र। चलचित्र चौतारीको ब्यानरमा निर्माणमा हुन लागेको नयाँ चलचित्र ‘प्रेमगञ्ज’ को लागि मुख्य कलाकार छनौट भएका छन् । यसअघि अडिसनमार्फत केही कलाकारहरु छनौट भएका थिए । चलचित्रको नायकमा तेज गिरी र नायिकामा बेनिशा हमाल छनौट भएको बताईएको छ ।
मुक्तिनाथ विकास बैंकका जागिरे तेजले यही फिल्मबाट मुख्य अभिनेतामा डेब्यु गर्न लागेका हुन् । विगत १ दशकदेखि नेपाली चलचित्र जगतमा सक्रिय नायिका बेनिशाले ‘ब्लाइन्ड रक्स’बाट राष्ट्रिय पुरस्कारसमेत हात पारिसकेकी छिन् । यस चलचित्र त्रिकोणात्मक विशुद्ध प्रेम कथामा आधारित रहेको निर्देशक परिच्छेद सेनले जानकारी दिए ।
सेन विगत १५ वर्षदेखि नेपाली चलचित्र क्षेत्रमा सक्रिय निर्देशक हुन । उनको निर्देशनमा बनेका यसअघिका चलचित्रले विभिन्न राष्ट्रिय तथा अन्तर्राष्ट्रिय अर्वाडहरु हाँसिल गर्न सफल भएका छन् ।
उक्त चलचित्रका लागि यसअघि नै सुप्रिया खनाल, राइडर प्रशान्त, सिमरन खड्का र आयुषी ढकाललाई अडिसनबाट छानिईसकेका छन् । उक्त चलचित्रमा अन्य कलाकार शिशिर राणा, रश्मी भट्ट, पबन भट्टराई, सन्जोग रसाइली लगायतको अभिनय रहनेछ भने सञ्जय लामाले छायांकन गर्ने भएका छन् ।
बिगत २५ वर्षदेखि नेपाली चलचित्र जगतमा स्पोट ब्वाईको रुपमा काम गर्दै आएका राजु फुयाँल निर्माता रहेका उक्त चलचित्रको कार्यकारी निर्मातामा अनन्तमान श्रेष्ठ रहेका छन् । यो चलचित्र अब छिट्टै छायांकनमा जाने निर्माण पक्षले जनाएको छ ।
