काठमाडौँ २४, चैत। ३८ सय केजी सुन तस्करी प्रकरणका नाइकेलाई सरकारले नै उन्मुक्ति दिएको छ । अन्य तस्करहरु पनि सेटिङमा उम्कने गरेका छन् । दुई महिनाअघि पक्राउ परेका केही व्यक्तिमाथि ठूलो गिरोह पत्ता लाग्ने सम्भावना देखिएपछि अनुसन्धानमा भएको चलखेलका आधारमा गिरोहका दर्जनौं व्यक्ति जोगिएका छन् ।गत १८ चैतमा सम्पत्ति शुद्धीकरण विभागले सुन तस्करीसम्बन्धि पहिलो मुद्दा दायर ग¥यो । अंकित कुमार अग्रवाल, सचिन कुमार अग्रवाल र भारतीय नागरिक नुरद्धीन अन्सारीविरुद्ध मुद्दा दायर भएको थियो ।
गत २० पुसमा नागढुंगामा बरामद भएको एक करोड ४६ लाख रुपैयाँमाथि अनुसन्धान गर्ने क्रममा उनीहरु ठूलो परिणाममा नेपालबाट भारतमा सुन तस्करीमा संलग्न रहेको देखियो । तर, त्यसमा को को संलग्न थिए कसरी तस्करी हुन्थ्यो भन्ने खुलाउन सकिएको छैन ।
स्रोतका अनुसार विभागले निष्पक्ष छानबिन गरेको अवस्थामा काठमाडौंका केही सुन पसले समेत तानिने सम्भावना थियो । अर्काे रमाइलो के छ भने एक करोड ४६ लाख बरामद भएकोमा विभागले दुई करोड ९२ लाखको बिगो दाबी गरिएको छ । बैंक खातामा भेटिएको ९५ लाख थपेर बिगो कायम गरिएको छ । उनीहरुको अन्य करोडौं सम्पत्ति र कारोबार खोजिएको छैन । जबकि, सुन तस्करीकै धन्दाबाट त्यसरी उनीहरुले करोडौं कमाएका थिए ।
विभागको यस्तो कमजोर अनुसन्धानले देशमा यस्ता अपराध मौलाउँदै गएका छन् । कालो धनको अनुसन्धान गर्ने निकाय सम्पत्ति शुद्धीकरण अनुसन्धान विभागका अधिकारीहरु आफैं कालोधन जम्मा गर्नतर्फ सक्रिय देखिएका छन् । भन्सारलगायत कार्यालयमा अकूत कमाएमा गजेन्द्रकुमार ठाकुरलाई सरकारले विभागको महानिर्देशक बनाएपछि अनुसन्धानमा हुने चलखेल बढेको पछिल्ला घटनाले देखाएको छ ।-दृष्टिबाट
