काठमाडौं, १४ वैशाख । मनाङ ख बाट प्रदेश सभा सांसद निर्वाचित राजीव गुरुङ अर्थात् दिपक मनाङको महत्व निकै बढेको छ । गण्डकी प्रदेशमा मुख्यमन्त्री पृथ्वी सुब्बा गुरुङविरुद्ध अविश्वासको प्रस्ताव दर्ता भएपछि एक दुई मत मात्र यताउता हुने अवस्था बनेपछि स्वतन्त्र सांसद मनाङेको महत्व बढेको हो ।
मनाङेलाई पक्षमा पार्न अविश्वासको प्रस्तावका पक्ष र विपक्ष दुवै समूह सक्रिय भएका छन् । उनलाई केन्द्रबाट शिर्ष नेताहरुले सिधै फोन गरेर मत मागेका छन् ।
विश्वस्त स्रोतका अनुसार मनाङेलाई माओवादी केन्द्रका अध्यक्ष पुष्पकमल दाहाल प्रचण्डले सोमबार फोन गरे अविश्वासको प्रस्तावको पक्षमा मत दिन आग्रह गरेका छन् । यसैगरी, काँग्रेसका शिर्ष नेताहरुले पनि सम्पर्क गरेका छन् । देउवानिकट काँग्रेस नेता गोपालमान श्रेष्ठले सम्पर्क गरी अविश्वासको प्रस्तावको पक्षमा मत दिन आग्रह गरेका छन् ।
दिपक मनाङेलाई प्रधानमन्त्री केपी शर्मा ओलीनिकटस्थहरुले पनि सम्पर्क गरी मुख्यमन्त्री गुरुङको पक्षमा मतदान गर्न आग्रह गरिसकेका छन् । तर, गुरुङले आफू एमाले नरहेको संकेत गर्दै स्वतन्त्र सांसदको अलग्गै कुर्सी राख्न निवेदन दिइसकेका छन् ।
मनाङे पछिल्लो समय बामदेव गौतमले नेतृत्व गरेको एकता अभियानमा छन् । उनी गौतमसँग नजिक छन् । सोमबार नै गौतमले आफ्ना विश्वासपात्र पठाएर मनाङेलाई सन्देश पठाएका छन् । मनाङे गौतमले भने अनुसार नै अविश्वासको प्रस्तावमा मतदान हुँदा प्रस्तुत हुने बुझिएको छ ।
