काठमाडौँ, २७ वैशाख: नेपाली कांग्रेसका सभापति शेरबहादुर देउवाले पार्टीका ज्येष्ठ राजनीतिज्ञसभाका सदस्य पृथ्वीबहादुर कार्कीको निधनप्रति दुःख व्यक्त गरेका छन् । ओखलढुंगा जिल्ला कार्यसमितिका पूर्वसभापति कार्कीको काठमाडौँस्थित ह्याम्स अस्पतालमा उपचारका क्रममा आज बिहान ७८ वर्षका उमेरमा निधन भएको हो ।
सभापति देउवाले आज शोक विज्ञप्तिमार्फत उनको निधनको खबरले आफूलाई मर्माहत र दुखित बनाएको उल्लेख जनाउँदै उनीप्रति श्रद्धाञ्जलि र शोकसन्तप्त परिवारजनमा समवेदना प्रकट गरेका छन् । सभापति देउवाले कार्कीले पार्टी संगठन निर्माण र नेपालका लोकतान्त्रिक आन्दोलनमा पु¥याएको सक्रिय योगदान पार्टीमा सदा स्मरणीय रहने जनाएका छन् ।
विसं १९९९ पुस १४ गते जन्मनुभएका कार्की २०१८ सालदेखि कांग्रेसको राजनीतिमा संलग्न रहँदै आएका थिए । पार्टी प्रतिबन्धितकालमा उनी कांग्रेस जिल्ला कार्यसमिति ओखलढुंगाको कोषाध्यक्षसमेत थिए। नेपालमा लोकतन्त्र प्राप्तिको आन्दोलनका क्रममा कार्कीले पटकपटक कारागार जीवन बिताएको उल्लेख गर्दै सभापति देउवाले उहाँको निधनबाट पार्टीले एक अग्रज नेतृत्वलाई गुमाएको जनाएका छन् ।-रासस/File Photo
