काठमाडौं, ३ जेठ । कोरोना महामारीको बिचमा पनि पेट्रोलियम पदार्थमा गरिएको मुल्यबृद्धी प्रति नेपाल विद्यार्थी संघले रोष प्रकट गरेको छ । नेबिसंघका महामन्त्री बलदेब तिमल्सिनाले कोरोना महामारीको कहरले नागरिक मरिरहेको भयाबह अवस्थाले जनजीवन अत्यन्तै कष्टकर बन्दै गैरहेको अवस्थामा जनताको ढाड सेक्न भ्रष्टाचारमा लिप्त सरकारले पुनः पेट्रोलियम पदार्थको मुल्य बढाउने निर्णयको घोर भर्सना गरेका छन् ।
तिमल्सिनाले आइतबार राती एक विज्ञप्ति जारी गर्दै महामारीको यो समयमा रोजगार, आय–आम्दानी र अबसर गुमेको स्थितिले आफु र आफ्नालाई बचाउने कसरी भन्ने संकटपुर्ण अवस्थामा पनि सरकारले पुनः पेट्रोलियम पदार्थको मुल्य बढाउने निर्णय प्रति आपत्ति जनाएका हुन् ।
महामन्त्री तिमल्सिनाले आइतबार राति जारी गरेको प्रेश बिज्ञप्ती भनिएको छ, ‘जनतालाई राहत र सहुलियतको जरुरी रहेको समयमा अन्य विकल्प तर्फ कुनै चासो नै नदिइ नेपाल आयल निगमले आइतबार राति १२ बजेदेखि लागु हुनेगरी पेट्रोल, डिजेल÷मट्टितेल तथा हवाई इन्धन (आन्तरिक उडान) को साविकको खुद्रा बिक्री मूल्यमा प्रतिलिटर २ रुपैयाँले बढाइएको छ भने अब पेट्रोल १ सय २३, डिजेल÷मट्टितेल १ सय ६ र हवाई इन्धन ७८ प्रतिलिटर उपभोक्ताले तिर्नुपर्ने छ,यसबाट जनतामाथी झन चरम शोषण हुने स्थिति पैदा भएको छ ।’
उनले उपभोक्तालाई चरम पिडा दिनेगरी नेपाल आयल निगमले अत्यावश्यक उपभोग्य बस्तु पेट्रोलियम पदार्थ माथी गरेको मुल्यबृद्धी तत्काल फिर्ता गर्न र पटक पटकको चर्को मुल्यबृद्वी र भ्रष्ट, जनतामारा सरकारको ज्यादती विरुद्ध खबरदारी गर्न सबैमा अपिल गरेका छन् ।
