काठमाडौं, ३१ जेठ । नेपाली कांग्रेसका बाग्मती प्रदेशका संसदीय दलका नेता ईन्द्र बानियाँले आफ्नो पार्टीका प्रदेशसभा सदस्य नरोत्तम बैद्यमाथि फौजदारी अभियोगमा मुद्दा चलाउन लागिएको भन्दै त्यसको विरोध जनाएका छन् । उनले प्रदेशसभामा बोलेको विषयमा सांसद बैद्यले प्रदेशसभाको बैठकबाटै माफी मागेर आत्मालोचना गरिसकेको विषयमा सरकारले फौजदारी कसुर लगाएर गिरफ्तार गर्न खोज्नु गलत हुने पनि बताएका छन् ।
आज (सोमबार) पत्रकार सम्मेलनमार्फत नेता बानियाँले संविधानअनुसार पनि बैद्यमाथि फौजदारी कसुर आकर्षित नहुने धारणा राखे । उनले फसाउने षड्यन्त्रका साथ कसुर लगाएर पक्राउ गरिए कांग्रेसले सशक्त रुपमा प्रतिकार गर्ने पनि चेतावनी दिएका छन् । उनले भने,‘माननीय नरोत्तम बैद्यजीले गल्ती स्विकारेर आफ्नो शब्द संसदको रेकर्डबाट हटाउन भनिसक्नुभएको छ । तर, षड्यन्त्र गरेर पक्राउ गरिए कांग्रेसले चुप लागेर बस्दैन् । हामी प्रतिकारमा उत्रिन्छौं ।’
जिल्ला प्रहरी कार्यालय मकवानपुरले सांसद वैद्यविरुद्ध एमाले कार्यकर्ताले दिएको उजुरी हिजोमात्रै दर्ता गरेको छ । संघीय वा प्रदेशसभाका सांसदले सदनभित्र अभिव्यक्त गरेको विषयलाई लिएर त्यहीँबाहेक अन्यत्र कुनै पनि निकायमा प्रश्न उठाउन वा उजुरी गर्न नपाइने उल्लेख छ । संविधानको धारा १८७ (१) मा प्रदेशसभाभित्र पूर्ण वाक स्वतन्त्रताको हक हुने सुनिश्चित गर्न व्यक्त विचारलाई लिएर कुनै सदस्यलाई पक्राउ गर्ने, थुनामा राख्ने वा अदालतमा कारबाही चलाउन पाइँदैन भन्ने उल्लेख छ।
