काठमाडौं, असार ८। नेपाली कांग्रेसका सभापति शेरबहादुर देउवाले पार्टीको आसन्न १४ औँ महाधिवेशनमा आफ्नै समूहबाट सभापतिका आकांक्षी विमलेन्द्र निधिलाई सहमतिमा ल्याउन थप प्रयत्न नगर्ने स्पष्ट पार्नुभएको छ ।
आफू निकट केन्द्रीय सदस्यहरुसँगको छलफलमा क्रममा देउवाले सभापतिमा लड्न पाउने निधिको अधिकारलाई आफूले बञ्चित नगर्ने प्रष्ट पार्नुभएको नेताहरुले बताएका छन् ।
निधिले पनि सभापतिमा लड्ने तयारी गरेपछि निकट नेताहरुले देउवासँग उहाँलाई सहमतिमा ल्याउन थप प्रयत्न नगरे परिणाममा असर पर्नसक्ने बताएका थिए । हिजो गण्डकी र बागमती प्रदेशका नेताहरुले निधिलाई जसरी पनि सहमतिमा ल्याउन देउवालाई सुझाव दिएका थिए ।
देउवा निकट नेता मोहनबहादुर बस्नेतले एउटै समूहबाट दुई जना सभापतिका उम्मेदबार भए परिणाममा धक्का पुग्न सक्नेबारे आफूहरुले सुझाव दिएको जानकारी दिनुभएको थियो ।
सभापतिमा चुनाव लड्नेबारे आज पनि देउवाले प्रदेशगत छलफल गर्नुभएको छ । सुदूरपश्चिम, लुम्बिनी र कर्णालीका नेताहरुले पनि निधिलाई सहमतिमा ल्याउन देउवालाई सुझाव दिएका छन् ।
तर सभापति देउवाले भने आफूले निधिलाई धेरैपटक सहमतिका लागि आग्रह गरिसकेकोले अब थप प्रयत्न नगर्ने बताएको छलफलमा सहभागी नेता वीरबहादुर बलायरले जानकारी दिनुभयो ।
निधिलाई नफकाउने रणनीति लिएका देउवाले पौडेल खेमाका प्रभावशाली नेताहरुलाई आफ्नो समूहमा तानेर अघि बढ्न खोजेको देखिन्छ । नेता बलायरले पार्टीका पदाधिकारी र पूर्वपदाधिकारीहरुसँग देउवाले परामर्श अघि बढाउने जानकारी दिनुभयो ।
देउवाले कांग्रेसलाई फेरि एक नम्बर पार्टी बनाएर मात्रै विश्राम लिने चाहना व्यक्त गरेर चुनावी तयारी गरिरहँदा कांग्रेसभित्र परम्परात समूह भत्काएर नयाँ समीकरण जन्माउने प्रयास पनि हुन थालेका छन् ।
नेविसंघको राजनीतिदेखि नै देउवालाई साथ दिँदै आउनुभएका नेता विमलेन्द्र निधिले आज पौडेल समूहमा रहेका नेताहरु शशांक कोइराला र प्रकासमानसिंहसँग छलफल गर्नुभयो ।
विरासतको राजनीति गर्दै आएका यी तीनैजना नेताहरुबीच भएको छलफललाई कांग्रेसभित्र नेतृत्वका लागि विकसित भइरहेको नयाँ समीकरणका रुपमा व्याख्या गर्न थालिएको हो ।
