काठमाडौं, १४ भदौ । रातो टीका निधारमा अनि आफ्नै चुनावी क्षेत्र । नेपाली काँग्रेसका लोकप्रीय नेता गगन थापाले कृष्णाष्टमी पारेर १४औं महाधिवेशनमा महामन्त्रीको उम्मेदवार बन्ने घोषणा गरेका छन् ।
उनले काठमाडौं महानगरपालिका वडा नं ३० स्थित आफ्नै चुनावी क्षेत्र रोजेर उम्मेदवारी घोषणा गर्नुलाई सामान्य मानिएको छ । तर, कृष्णाष्टमीको दिन रातो टीका लगाएर उम्मेदवारी घोषणा गर्नु अर्थपूर्ण छ ।
नेपाली काँग्रेसभित्र पछिल्लो समय हिन्दु सेन्टिमेन्ट जित्ने प्रतिष्पर्धा नै चलेको छ । यसबीच गगन थापाले पनि प्रतिष्पर्धामा आफूलाई उभ्याएका छन् ।
यसअघि उपसभापति विमलेन्द्र निधिले हिन्दु शक्तिपीठका पूजारीहरुबाट आशिर्वाद लिएर सभापतिको उम्मेदवारी घोषणा गरेका थिए । सभापति शेरबहादुर देउवाले पनि धार्मिक गतिविधिहरु बढाउन थालेका छन् ।
पूर्वमहामन्त्री प्रकाशमान सिंह पनि शक्तिपीठमा जान थालेका छन् । उनी दक्षिणकालीमा दर्शन गरेको तस्बिर सामाजिक सञ्जालमा केही महिना अघि राखिएको थियो ।
