काठमाडौं, १७ भदौ। आज साँझ दशरथ रंगशालामा रोचक दृश्य देखिनेछ । महिनौंपछि रंगशालामा दर्शकहरु हुनेछन् । नेपाल र भारतको फुटबल टोलीले मैत्रीपूर्ण खेल खेल्नेछन् ।
नेपालका स्टार खेलाडीसँगै भारतको फुटबल टोलीका कप्तान सुनिल क्षेत्री पनि आकर्षणको केन्द्र हुनेछन् । क्षेत्री नेपाली भाषी भारतीय नागरिक हुन् । उनको मावली नेपाल नै हो । त्यसकारण उनी नेपालमा पनि प्रीय छन् ।
आजको खेल साँझ साँढे ५ बजे काठमाडौंको त्रिपुरेश्वरस्थित दशरथ रंगशालामा सुरु हुनेछ । एन्फाले यो खेलमा रंगशालको झण्डै एक तिहाई क्षमता अर्थात ५ हजार १ सय दर्शकलाई रंगशालामै उपस्थित भएर खेल हेर्न दिने भएको छ ।
तर, खेल हेर्ने दर्शकले कोभिडको पूर्ण खोप लगाएको वा कोरोना परिक्षणको रिपोर्ट नेगेटिभ आएको देखाउनु पर्नेछ । नेपालले भारतसँग दुईवटा मैत्रिपूर्ण खेल खेल खेल्न लागेको हो ।
दोस्रो खेल आगामी आइतवार हुनेछ । असोजमा माल्दिभ्समा आयोजना हुने साफ च्याम्पियनसिपको तयारीका लागि नेपाल र भारतले मैत्रीपूर्ण खेल खेल्न लागेका हुन् ।-File Photo
