मृत्यु भइसकेकाको नामको १० वर्षयता वृद्धभत्ता हिनामिना, ५ कर्मचारी पक्राउ

काठमाडौं, १३ असोज । मृत्यु भइसकेकाको नामको वृद्धभत्ता लिएर हिनामिना गर्ने कर्मचारीहरुविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ । अख्तियारले साविक उदयपुरको रामपुर ठोक्सिला गाविसका कर्मचारीहरुलाई नियन्त्रणमा लिई मुद्दा दायर गरेको हो ।

अख्तियारले सूचना जारी गरी तत्कालिन गाविस सचिवहरु केशव प्रसाद आचार्य, लोकेन्द्र कार्की, विसाल सुन्दास, माधवप्रसाद खतिवडा र पुष्पराज सिग्देलमाथि मुद्दा दायर गरेको हो । उनीहरु विभिन्न समयमा तत्कालिन रामपुर ठोक्सिला गाविसका सचिव थिए ।

सिग्देल शाखा अधिकृतबाट सेवानिवृत्त भइसकेका छन् । उनीमाथि १ लाख ७६ हजार वृद्धभत्ता हिनामिनाको आरोप छ । माधवप्रसाद खतिवडा हाल रौतामाई गाउँपालिकाका अधिकृत छैटौं पदमा छन् । उनीमाथि ३ लाख १४ हजार हिनामिनाको आरोप छ ।

विशाल सुन्दास हाल तथ्यांक कार्यालय उदयपुरमा खरिदार छन् । उनीमाथि ८२ हजार हिनामिनाको आरोप छ । लोकेन्द्र कार्की हाल रौतामाई गाउँपालिका वडा नं ७ का सचिव छन् । उनीमाथि ७८ हजार हिनामिनाको आरोप छ । सबैभन्दा बढी हिनामिनाको आरोप लागेका केशवप्रसाद आचार्य हाल मालपोत कार्यालय उदयपुरमा नायब सुब्बा छन् । उनीमाथि ९ लाख ९० हजार ५ सय हिनामिनाको आरोप छ ।

पाँच जनाले गरी १६ लाख ४० हजार ५ सय हिनामिना गरेको देखिन आएको अख्तियारले जनाएको छ । उनीहरुले २०६३ साल देखि २०७२ सालसम्म सामाजिक सुरक्षा भत्ता प्राप्त गर्नेहरुको मृत्यु र मृत्यु दर्ता भएपश्चात पनि उनीहरुको नामावली सामाजिक सुरक्षा भत्ता वितरणमा भरपाईमा कैफियत जनाई लगत कट्टा गर्नुपर्नेमा नगरी मृतक लाभग्राहीहरुको नाममा र दोहोरो नामको भरपाईबाट समेत साकाजिक सुरक्षा मत्ता हिनामिना गरेको उल्लेख छ ।