एजेन्सी, १६ असोज। जनवादी गणतन्त्र चीन स्थापना दिवसको अवसरमा चीनले २५ वटा सैन्य विमान आफ्नो हवाई सुरक्षा क्षेत्रमा पठाएको भन्दै ताइवानले आपत्ति जनाएको छ । चीनले शुक्रबार ताइवानको स्वशासित टापु नजिकै विमान पठाएर शक्ति प्रदर्शन गरेको भन्दै ताइवानले आपत्ति जनाएको हो। ताइवानको रक्षा मन्त्रालयले चीनले २२ लडाकु, दुई परमाणु बमवर्षक र एक पनडुब्बी विरोधी विमान आफ्नो रक्षा क्षेत्रमा पठाएको जनाएको छ ।
चीनले भने यस क्षेत्रलाई आफ्नै क्षेत्र भएको दाबी गर्दै आएको छ । बेलायतले ताइवानमा दुई युद्धपोत पठाएको आरोप लगाएकै साता चीनले फेरि ताइवानमा २५ सैन्य विमान पठाएको हो । चीनले यसअघि पनि पटक-पटक ताइवानको रक्षा क्षेत्रमा युद्ध विमान पठाइसकेको थियो । गत साता ताइवानले ट्रान्स प्यासिफिक व्यापार सम्झौतामा समावेश हुन आवेदन दिएपछि चीनले आफ्ना २४ विमान ताइवानको क्षेत्रमा पठाएको थियो ।
चिनियाँ नेताहरुले ताइवानलाई एक दिन कब्जा गर्ने प्रतिक्रिया दिँदै आएका छन् । आवश्यक परेमा बलपूर्वक कब्जा गर्ने उनीहरुले बताउँदै आएका छन् । २०१६ मा ताइवानमा राष्ट्रपति निर्वाचनपछि चीनलाई दबाब बढ्न थालेको बताइन्छ । ताइवानका राष्ट्रपति साइ इङ वेनसहित नेताहरुले चीनबाट स्वतन्त्र भएको प्रतिक्रिया दिन थालेपछि चीनले यस क्षेत्रमा थप गतिविधि बढाउँदै आएको छ । ताइवानमाथि चिनियाँ गतिविधिलाई लिएर अमेरिकाले भने चीनको आलोचना गर्दै आएको छ ।-Photo: Agency
