काठमाडौं, १९ असोज । नेकपा (एमाले) का प्रभावशाली नेता तथा सांसद नवराज सिलवालले वर्तमान प्रधानमन्त्री शेरबहादुर देउवालाई सफल भन्नु भनेको हाँस्यास्पद हुने बताएका छन् । उनले देउवा भाग्यमानी नेता त होलान् तर देश र जनताको पक्षमा काम गर्ने नेता नभएको जिकिर गरे । हिजो राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले यस्तो बताएका हुन् ।
उनले भने,‘उहाँ प्रधानमन्त्री धेरै पटक बन्ने नेता हुनुहोला, भाग्यमानी पनि हुनुहोला, तर केपी ओलीजत्ति काम गरेर देखाउनुभएको छ ?’ उनले यो देशको विकास गर्नमा एमालेको महत्वपूर्ण योगदान पुर्याएको पनि दाबी गरे । उनले अध्यक्ष ओलीको पालामा मुलुकको प्रतिष्ठा जोगिनेगरि काम गरेको सुनाए । उनले भने,‘अहिले साँढे दुई महिनामा यो सरकारले पूर्णता त पाउन सकेन, उहाँ कसरी सफल नेता त ?’ उनले एमाले नेतृत्वको खासगरी केपी ओली नेतृत्वको सरकार जति काम नेपालमा यसअघि कुनैपनि सरकारले गर्न नसकेको जिकिर गरे ।
उनले आफू डिआईजी हुँदा आईजिपी बन्नको लागि नेपालका लागि तत्कालिन भारतीय राजदूत रञ्जित रायसँग भेट्न नगएको स्पष्ट पारे । उनले रायसँग आफ्नो व्यक्तिगत चिनजान नभएको जिकिर गरेका छन् । उनले आफू अफिसिल फंक्शनमा नेपालस्थित् भारतीय दूतावास गएको भने स्विकारे । तर, व्यक्तिगत रुपमा आफूलाई आईजिपी बनाउन फेभर गरिदिनुहोस भनेर भन्न नगएको उनको दाबी छ ।
