काठमाडौं, २६ असोज । पछिल्लो २४ घण्टामा ७ सय ९२ जनामा कोरोना भाइरसको संक्रमण पुष्टि भएको छ। स्वास्थ्य मन्त्रालयले आज सार्वजनिक गरेको अपडेटअनुसार ९ हजार ६ सय १९ जनाको कोरोना परीक्षण गर्दा ७ सय ९२ जनामा पछिल्लो २४ घण्टामा संक्रमण पुष्टि भएको हो । ७ हजार ६० जनाको पिसिआर परीक्षण र २५५९ जनाको एन्टिजेन परीक्षण गरिएको थियो। नेपालमा हाल १४ हजार ५५४ जना सक्रिय संक्रमित छन्।
यस्तै, पछिल्लो २४ घण्टामा कोरोना भाइरसको संक्रमणबाट १४ जनाको मृत्यु भएको छ। योसँगै मृत्यु हुनेको संख्या ११ हजार २५७ पुगेको छ। ९१० जना निको समेत भएको मन्त्रालयले जनाएको छ।
