गलेश्वर, १ कात्तिक । आइतबार रातिदेखिको भीषण वर्षाका कारण बेनी-जोमसोमलगायत म्याग्दीका ग्रामीण सडकहरु अवरुद्ध भएका छन् । वर्षाका कारण पहिरो र हिलोले बेनी-जोमसोम सडकखण्डको काभ्रेभीरमा सवारी साधन वारपार गर्न नसक्दा मुस्ताङ भ्रमणमा जानलागेका र मुस्ताङबाट फर्कँदै गरेका यात्रुबीच बाटोमा नै अलपत्र परेका छन् । म्याग्दीलगायत धौलागिरि क्षेत्रमा अहिलेसम्म पनि भीषण वर्षा भइरहेको छ । वर्षासँगैको हुरी बतासले यस क्षेत्रमा लगाइएको धानबाली, तरकारी र फलफूलबालीमा समेत क्षति पु¥याए पछि कृषकसमेत चिन्तित बनेका छन् ।
त्यसैगरी ग्रामीण सडक अवरुद्ध हुँदा दसैँ मनाएर आफ्नो कार्यक्षेत्रमा फर्कँदै गरेका मानिस ठूलो समस्यामा परेका छन् । गाडी गुड्ने सडकमा खोला बगेको छ । बेनी-बगरफाँट-भकिम्ली सडकको बाङ्गेघरा क्षेत्रमा सडकमै पोखरी बनेपछि साना सवारी साधनसमेत चल्न नसकेको स्थानीय राजकुमार सुवेदीले जानकारी दिनुभयो ।
पहिरो र हिलोेका कारण बेनी-दरवाङ, बेनी-मालढुङ्गा, बेनी-बागलुङ सडकखण्डमा पनि सवारी चलाउन कठिन भएको बेनी-दरवाङ सडकखण्डका सवारी चालक सूर्यबहादुर हुमेनले बताउनुभयो । “ठूला सवारी साधन बल्लबल्ल तातोपानी कटेका छन्, ट्याक्सी जान नसेकेका कारण सिंगाबाट फर्काएर बेनी ल्याएँ”, हुमेनले भन्नुभयो । यसैगरी म्याग्दीको उच्च लेकाली क्षेत्रमा हिमपात हुनथालेको छ । म्याग्दीको गुर्जा, सोलेको धुरी, रुम, घोडेपानीलगायत क्षेत्रहरूमा हिमपात हुन सुरु भएको स्थानीयले बताएका छन् ।
जिल्लाको उपल्लो भेगमा अचानक जाडो बढेपछि वृद्धवृद्धा र पशुचौपायालाई समस्या उत्पन्न भएको छ । ज्येष्ठ नागरिक घरबाट बाहिर निस्कन सकेका छैनन् । उनीहरू घरभित्र नै आगो बालेर बसेका रुमका टेकबहादुर घर्तीले जानकारी दिनुभयो । जिल्लाका तल्लो भेगमा लगाइएको धानबाली वर्षासँगैको हुरी बतासले ढालेर कामै नलाग्ने बनाई दिए पछि कृषक चिन्तित भएका छन् । (रासस)
