राष्ट्रिय विपत् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले मौसम पूर्वानुमान गर्न नसकेकाले अहिले धनजनको अल्कपनीय क्षति बेहोर्नुपरेको बताएका छन् । साथै उनले जोखिम न्यूनीकरणमा लगानी गर्न सक्दा यस्ता क्षतिबाट सुरक्षित हुन सकिने उनको दाबी छ ।
आज बिहान रेडियो नेपाली नेटवर्कको कार्यक्रम नेपाली बहसका लागि पत्रकार ऋषि धमलासँग कुरा गर्दै पोखरेलले भने, “जोखिम न्यूनीकरण हुन सक्छ भन्ने उदाहरण जापान र न्यूजिल्यान्ड नै छन् । हामीले पनि यसमा लगानी गर्दै जान सक्यौं भने १० वर्षभित्र क्षति घटाउन सक्छौं ।”
प्राधिकरणले राहत, उद्धार पुनःनिर्माणलगायतका काम विभिन्न सुरक्षा संयन्त्र, स्थानीय तह, संघसंस्था, मिडियालायतको सहभागितामा गरिरहेको उनले बताए । उनले भने, “कात्तिकमा मनसुन सकिएपछि यति भयानक बाढीपहिरो आउला भन्ने अनुमान नै गरेका थिएनौं । विज्ञान र प्रविधिले पनि हामीलाई पूर्वानुमान दिएन । पूर्वदेखि पश्चिमसम्म विमानस्थल डुबानमा परे । धानबालीमा ठूलो नोक्सानी भयो । धनजनको क्षति भयो । सडक, सञ्चार, विद्युत् अवरुद्ध भयो । समयमै फोरकास्ट हुन सकेको भए यत्रो क्षति हुने थिएन ।”
पोखरेलले हाम्रो भूबनोट नै जोखिमपूर्ण रहेको बताए । उनले भने, “हाम्रो समृद्धिको कारक नै मनसुन हो । साथै यसको कालो पाटो पनि छ । कृषि बिमाको व्यवस्था हुन सक्दा सरकार र किसानलाई भार पर्दैन । २०७४ मा सवा अर्ब लगानी गरेर किसानको हाँसो फर्काएका थियौं । यस पटक पनि कृषि मन्त्रालयले क्षतिको विवरण दिएपछि राहत दिन सकिन्छ ।”
